Rita Ora sapo ka hyrë fuqishëm në garën për hitin e verës me këngën e saj më të re “Heat”.
Kënga, që publikohet të premten, është një ritëm flirtues dhe energjik, perfekt për atmosferën e pishinave. Fillon me një fjali provokuese që është e denjë për t’u bërë meme: “Sex on sight, any way you like, inside or outside”. E pra, pse të bësh të nënkuptuarën, kur mund ta thuash troç?
Nuk është rastësi që “Heat” lansohet pikërisht në ditën kur Rita performon në World Pride Music Festival në Washington, D.C. Me gjithë energjinë dhe ngjyrën që sjell, kjo këngë duket si krijuar për skenën e atij festivali – dhe për aplikacione si Grindr, shkruan Official Charts.
“Heat” është prodhuar nga Peter Thomas, i njohur për bashkëpunimet me yllin e popit alternativ Betty Who, ndërsa në tekst kanë kontribuar edhe Troye Sivan dhe Leland – ky i fundit njihet për sukseset e tij me këngë si “1999” nga Charli XCX dhe Troye, “Rare” nga Selena Gomez, apo “Kings & Queens” nga Ava Max. Ai gjithashtu ka bashkëshkruar hitet e famshme të “RuPaul’s Drag Race UK” si “Break Up (Bye Bye)” dhe “UK Hun?”, kështu që ka përvojë të madhe në krijimin e këngëve që mbesin gjatë në mendje.
“Heat” është lozonjare, provokuese dhe tepër e drejtpërdrejtë. Kur Rita këndon “your heat on me, on me, on me”, është e qartë se nuk po mendon për ndonjë ngrohës Dyson! Videoklipi i xhiruar në Miami Beach është po aq tërheqës – përfshin trupa të palestruar që stërviten në rërë – dhe na kujton se Rita është mjeshtre në krijimin dhe prezantimin e këngëve pop të kuruara deri në detaj, me stil e finesë.
Vetë këngëtarja shprehet: “Të publikoj ‘Heat’ në të njëjtën ditë me performancën time në World Pride është mënyra perfekte për të nisur verën — është një moment shumë i veçantë për mua dhe për të gjithë fansat që më kanë mbështetur ndër vite.
Jam e fiksuar pas kësaj kënge dhe, në të vërtetë, thjesht doja të argëtohesha! Është e guximshme, lozonjare dhe plot energji të artë e pozitive. Për mua ka të bëjë me lirinë, gëzimin, të qenurit vetvetja pa kërkuar falje dhe krenarinë për atë që je!”
S’mund të thuhej më mirë.
Rita tashmë numëron 22 këngë në Top 40 të Mbretërisë së Bashkuar – dhe nuk do të ishte aspak çudi që “Heat” të bëhej e 23-ta. Videoklipin mund ta shikoni më poshtë.
