Cristiano Ronaldo, që është në ndjekje të rekordeve, nuk do të jetë “atraksioni” i vetëm te Përfaqësuesja e Portugalisë, që do të përpiqet ta fitojë titullin e dytë rresht në Kampionatin Evropian.
Ronaldo do të përpiqet të bëhet shënuesi më i mirë i të gjitha kohërave me një ekip kombëtar, por këtë herë do të ketë shumë më tepër për t’u parë në ekipin e Portugalisë. Kampionia në fuqi do ta ketë një prej ekipeve të saj më të talentuara ndër vite në “Euro 2020” të mbushur me lojtarë që mund ta mbështesin Ronaldon drejt thyerjes së rekordeve dhe ta bëjnë Portugalinë përsëri një pretendente për titull.
Grupi i talenteve është padyshim më i madh sesa ishte pesë vjet më parë në Francë, ku Portugalia fitoi titullin me një skuadër që pati më shumë efikasitet sesa lojë të bukur. Portugezët e fituan trofeun me vetëm një fitore në 90 minuta gjatë gjithë turneut.
Në “Euro 2020” Portugalia do të luajë në Grupin F, që konsiderohet si tejet i vështirë, pasi përfshin edhe Gjermaninë, Francën dhe Hungarinë. Si Gjermania, ashtu edhe Hungaria, ndeshjet e fazës së grupit kundër Portugalisë do t’i luajnë në shtëpi, Munich dhe Budapest.
“Unë kam besim të madh te lojtarët e mi dhe kam bindjen se Portugalia është një kandidate e fortë për titull”, tha përzgjedhësi i Portugalisë, Fernando Santos.
Ronaldo, 36-vjeçar, do të mbështetet kësaj radhe nga lojtarët si Joao Felix, Bernardo Silva, Bruno Fernandes, Ruben Dias dhe Diogo Jota.
Shumë prej këtyre lojtarëve në “Euro 2020” do të futen pas formës fantastike që e treguan tek ekipet e tyre në sezonin e sapopërfunduar. Në fakt, shumica prej tyre përfituan shumë nga shtyrja e Kampionatit Evropian për një vit shkaku i përhapjes së koronavirusit.
Diogo Jota ishte një lojtar i Wolverhamptonit, i cili nuk kishte luajtur shumë për Portugalinë vitin e kaluar, por tani është shndërruar në titullar si te Liverpooli, ashtu edhe te përfaqësuesja portugeze, për të cilën ka shënuar gjashtë gola në 12 paraqitje. Ruben Dias është përmirësuar pas sezonit të tij të parë te Manchester City, ekip me të cilin u shpall kampion. Madje, Dias u zgjodh edhe futbollisti më i mirë i edicionit në Premier League nga gazetarët. Ndërsa, Bruno Fernandes konsiderohet njëri prej mesfushorëve më të mirë jo vetëm te Manchester Unitedi, por edhe në Evropë. Joao Felix fitoi një vit shtesë përvojë dhe shkëlqeu në një ekip si Atletico Madridi, që arriti ta fitojë titullin e kampionit në La Liga.
I përfshirë në listën e përzgjedhësit Santos për “Euro 2020” është edhe sulmuesi 22-vjeçar, Pedro Gonçalves, i cili ende nuk e ka asnjë ndeshje me ekipin A. Gonçalves ishte njëri prej lojtarëve kryesorë te Sportingu i Lisbonës, skuadër që e ndihmoi ta fitojë titullin e kampionit të Portugalisë për herë të parë pas vitit 2002.
“Lista nuk është rezultat i një analize të bërë prej dy ose tre ditësh”, tha Santos. “Nëse i kam ftuar këta lojtarë, kjo është për shkak se të gjithë kanë cilësi të shkëlqyeshme”.
Mund të kishte edhe më shumë talente në skuadrën e Portugalisë nëse i riu Pedro Neto nuk do mbetej jashtë listës për shkak të lëndimit në gju. Ai ishte një nga lojtarët më të mirë te Wolverhamptoni në Angli, ku në vitin e tij të parë ishte titullar i rregullt dhe gjithashtu ishte i pazëvendësueshëm te Përfaqësuesja e Portugalisë.
Krahas Diasit, edhe Silva ishte lojtar bartës te skuadra e Manchester Cityt. Madje, disa prej lojtarëve që ishin pjesë e Portugalisë në Botërorin “Rusia 2018” kur u eliminua në 1/8 e finales nga Uruguai, do të paraqiten edhe në Evropianin e këtij viti. Reparti i mbrojtjes përsëri do të udhëhiqet nga 38-vjeçari Pepe, lojtari më i vlefshëm në finalen e “Euro 2016”, kur Portugalia mposhti Francën.
Ronaldo do të luajë në kampionatin e tij të pestë evropian dhe do të kërkojë ta shtojë edhe një rekord tjetër në listën e tij. Ai është vetëm gjashtë gola larg rekordit të të gjitha kohërave për një ekip kombëtar. Rekordin e 109 golave e mban ish-sulmuesi i Iranit, Ali Daei, i vetmi lojtar tjetër i futbollit që ka tejkaluar shifrën e 100 golave. Ronaldo shënoi katër gola në Kampionatin Botëror “Rusia 2018” dhe tre sosh në Euro “2016”. Ai luajti më pak se gjysmë ore në finale kundër Francës pesë vjet më parë, sepse u dëmtua. Sulmuesi i Juventusit ka shënuar për Portugalinë në çdo vit kalendarik që nga goli i tij i parë ndërkombëtar në vitin 2004. Ronaldo deri më tani ka realizuar 103 gola në 173 paraqitje për Portugalinë.