Ish-ushtari i UÇK-së që punonte si sigurim, do të plagosej nga dy plumba në sheshin e Prishtinës.
Nga vendi ku pothuajse u vra nga njësiti rumun i policisë, Zeneli thotë se mban mend gjithçka që ndodhi.
Në protestën më të dhunshme deri atëherë, kishin qëlluar aktivistët e Vetëvendosjes, të cilët e ndihmuan Zenelin e plagosur.
E Arbër Vokrri që ishte fotograf i VV-së në protestë, nuk harroi që gjithë këtë ngjarje ta dokumentonte.
Por, si absolvent i mjekësisë, Vokrri tregon se si i dha edhe ndihmën e parë kolegut nga Vetëvendosja.
Zeneli ishte bartur nga aktivistët për ta dërguar pastaj me taksi në QKUK, ku edhe mori trajtimin e parë.
Por, me kaq ndërhyrjet kirurgjike nuk përfunduan për ish-ushtarin e UÇK-së.
Ai u transportua për në Shkup, pasi mjekët besuan se Zeneli nuk do të shpëtonte i gjallë.
E pas 3 jave në komë, e disa ndërhyrjeve në Prishtinë e Shkup, ai arriti t’i shpëtojë vdekjes.
Pasi u kthye në familje, ai mori një telefonatë nga mjekët amerikanë që e trajtuan në fillim e të cilët ishin skeptikë që ai do të shpëtonte.
Plumbat vazhdon t’i ketë në trup ani pse kanë kaluar 13 vjet.
Zeneli thotë se nuk e kishte menduar asnjëherë se drejtësia nuk do të vihej në vend, për këtë arsye shprehet se është dëshpëruar.
Në protestën e VV-së të organizuar kundër propozimit të Ahtisarit e në kërkim të vetëvendosjes u vranë 2 pjesëtarë të kësaj lëvizjeje e 84 të tjerë u plagosën.
