Martin Schoeller shëtit nëpër dhomat e ekspozitës duke inspektuar sesi shfaqen fotografitë e tij. Për pak kohë ndalet për të diskutuar detajet e ndriçimit me kuratoren Anke Degenhard.
Derisa Schoeller e tund kokën në shenjë miratimi, flokët e tij ndjekin lëvizjet e shpejta të kokës. Fotografi i lindur në vitin 1968 jeton në New York që nga vitet ‘90, por shpesh vjen në Gjermani.
Ideja për këtë projekt unik fotografish me të mbijetuarit e Holokaustit erdhi gjatë një takimi me Kai Diekmann në “Paris Bar” në Berlin. Ish-kryeredaktori i tabloidit gjerman “Bild” ka qenë prej kohësh kryetar i Rrethit të Miqve të Gjermanisë të “Yad Vashem”, qendrës memorialë të Holokaustit në Izrael, shkruan sot Koha Ditore.
“Yad Vashem” u zgjodh si lokacioni për fotosesione – një vend i njohur për të gjithë të mbijetuarit, thotë Schoeller për DW-në. Bordi i Qendrës Botërore të Përkujtimit të Holokaustit në Jerusalem u pajtua me shpejtësi për projektin e ekspozitën “Survivors. Faces of Life after the Holocaust” (Të mbijetuarit. Fytyrat e jetës pas Holokaustit) dhe iu dha përgjegjësia për zgjedhjen e 75 personave që do të portretizohen, për të shënuar 75-vjetorin e çlirimit të Kampit të Përqendrimit të Auschvitz më 27 janar 1945.
Të mbijetuarit e Holokaustit, disa prej tyre mbi 90 vjeç, e njohin tashmë njëri-tjetrin. Ata vijnë rregullisht në Qendrën e përkujtimit për të ndarë historinë e tyre me vizitorët dhe grupet e të rinjve nga e gjithë bota.
Të mbijetuarit e Auschvitzit si Bat-Sheva Dagan, i lindur në 1925 në Poloni, janë thellësisht të përkushtuar për arsimim, raporton kuratori izraelit Vivian Uria, i cili e zhvilloi ekspozitën me kolegen e saj gjermane Anke Degenhard.