Është arrestuar në Kosovë 29-vjeçari Aldo Majnishta, i shpallur në kërkim si një nga organizatorët e rrëmbimit dhe zhdukjes së Jan Prengës.
Policia bën me dije se ai u lokalizua falë shkëmbimeve të Interpol Tiranës dhe autoriteteve Kosovare. Mësohet se në momentin e kapjes, 29 vjeçari nga Shkodra, ka paraqitur pranë autoriteteve kosovare dokumentet e një shtetasi tjetër.
Në vitin 2022 Gjykata e Posaçme kundër Korrupsionit dhe Krimit të Organizuar, ka caktuar ndaj Majnishtës masën e sigurisë “Arrest në burg”, për rrëmbimin, pengmarrjen dhe asgjësimin e kufomës së Jan Prengës më 17 janar të viti 2020 në Kamëz.
Majnishta akuzohet si pjesë e grupit të strukturuar kriminal që pasi e rrëmbyen Jan Prengën e transportuan me makinë në kompleksin “Golden” në Shijak në pronësi të Altin Hajrit, me urdhër të Dritan Rexhepit dhe Gentian Funiqit.
Pamje filmike për SPAK përbëjnë prova të sigurta që konfirmojnë vrasjen e Jan Prengës pavarësisht se trupi nuk është gjetur ende. Gjykata e Posacme po heton për ngjarjen Dritan Rexhepin, Gentian Funiqin, Geraldo Martini, Aldo Majnishtën, Martin Bletën, Korado Geshtenjën dhe Artan Docajn.
Gjyqi për Altin Hajrin për të njejtat akuza është pezulluar deri ne njoftimin dhe kapjen e tij.
Gjykata e Tiranës ka dënuar me burg përjetë Festim Bixhdilin, rojen e kompleksit privat nga garazhi i të cilit u transportua trupi i Jan Prengës.
