Kreu i Republikës Çeçene, Ramzan Kadyrov, gati sa nuk u mbyt të enjten ndërsa po kalonte pushimet në qytetin turistik të Bodrumit, sipas mediave turke.
Incidenti thuhet se ka ndodhur në një hotel me pesë yje në lagjen Kaynar të Bodrumit, që ndodhet në provincën Muğla.
Sipas raportimeve të medias, Kadyrov kishte hyrë në ujë për të notuar kur “papritmas filloi të humbiste ndjenjat” dhe rrëshqiti nën sipërfaqe.
“Incidenti ndodhi më 24 korrik, kur Ramzan Kadyrov filloi të mbytej menjëherë pasi hyri në ujë. Stafi i hotelit reagoi shpejt duke thirrur ambulancën dhe shërbimet e shpëtimit. Atij iu dha ndihma e parë menjëherë në plazh” shkruajnë mediat turke.
Oficerët e Rojës Bregdetare Turke dhe stafi i hotelit vunë re se ai ishte në vështirësi dhe ndërhynë.
Ekipet e urgjencës ofruan ndihmën e parë në vendngjarje përpara se ta transferonin Kadyrovin në një klinikë private, ku gjendja e tij u përshkrua më vonë si e qëndrueshme.
Burimet e lajmeve deklaruan se pas vlerësimit dhe vëzhgimit mjekësor, ai nuk ishte në “gjendje kërcënuese për jetën”.
Autoritetet çeçene ende nuk kanë dhënë asnjë deklaratë zyrtare.
Udhëheqësi 48-vjeçar çeçen, një aleat i ngushtë i presidentit rus Vladimir Putin, kishte qenë me pushime në bregdetin e Egjeut kur ndodhi incidenti.
Kremlini është mbështetur te Kadyrov për të ruajtur stabilitetin në Kaukazin e Veriut pas viteve të trazirave.
Ramzani e trashëgoi këtë pozicion nga babai i tij, Akhmad Kadyrov, një rebel i cili fillimisht i shpalli luftë Moskës gjatë konfliktit të parë çeçen.
Në kohën e Luftës së Dytë Çeçene në vitin 1999, si Akhmad ashtu edhe Ramzan — i cili shërbeu si shofer personal dhe truproja e babait të tij — kaluan në anën ruse.
Si Putini — i cili në atë kohë kaloi nga drejtor i FSB-së në emërimin si kryeministër rus — ashtu edhe Kadirovi u bënë të famshëm gjatë Luftës së Dytë Çeçene, të cilën ekspertët dhe burimet e inteligjencës besojnë se u nxit nga vetë Putini.
Edhe pse Kadyrov është kritikuar që atëherë për përdorimin e vrasjeve jashtëgjyqësore, torturës dhe heshtjen e disidentëve, autoritetet ruse kanë penguar kërkesat për hetime. Shëndeti i udhëheqësit çeçen thuhet se po përkeqësohet me shpejtësi.
Ai u përpoq të jepte dorëheqjen në maj. Megjithatë, thuhet se Putin është kundër pasimit të Kadyrov nga djali i tij, Adam, i cili është 17 vjeç.
Bodrumi është një destinacion popullor midis njerëzve të pasur dhe elitave rajonale, përfshirë rusët.
