Kryedemokrati Basha vijon të paralajmërojë mbi ndikimin në ekonominë shqiptare të luftës në Ukrainë, ndonëse është i bindur se anëtarësimi në NATO mbron vendin nga shtrirja e konfliktit të armatosur në vendin tonë.
“Shqipëria sot është pjesë e NATO-s, ndaj askush nuk ka guximin të na kërcënojë, askush nuk ka guximin të na mësyjë, sinoret tona, kullat tona, shtëpitë tona, fëmijët tanë, krenarinë tonë, qytetet tona, sepse çdo sulm kundër Shqipërisë, është sot sulm kundër NATO-s, është sulm kundër Shteteve të Bashkuara të Amerikës dhe 29 vendeve të tjera anëtare”, tha Basha.
Ajo që rrezikohet sipas Bashës, është ekonomia shqiptare, në të cilën kriza po reflektohet përmes rritjes së çmimeve.
“Kjo situatë e krijuar me sulmin e Rusisë mbi Ukrainën do të ndikojë në ekonominë tonë. Siç e shikoni çmimi i karburantit që ka qenë në stratosferë po vazhdon të rritet prandaj siç e keni dëgjuar edhe disa ditë më parë, thirrja ime ndaj kësaj qeverie është të marrë masa të menjëhershme. Të ndalë pagesat korruptive të inceneratorëve që vazhdojnë t’i bëjnë edhe sot e kësaj dite që siç e patë ishte një aferë e pastër korruptive”, shtoi kryedemokrati.
Krejt e kundërt është qasja e socialistëve, të cilët përballë kërkesave për ndërhyrje të qeverisë në frenimin e rritjes së çmimeve dhe inflacionit, ngrenë supet dhe largojnë përgjegjësitë.
Sipas Taulant Ballës, qeveria po ndërmerr të gjitha hapat që ka në kompetencë për ruajtjen e qytetarit nga kriza dhe rritja e çmimeve.
