Tensioni po rritet në Ukrainën lindore, në kufirin me Rusinë. Trupat ruse në kufi “janë gati për të goditur”, paralajmëron sekretari amerikan i Mbrojtjes Lloyd Austin, duke përsëritur alarmin e ngritur nga Presidenti Biden në konferencën telefonike me liderët e tjerë perëndimorë të premten në mbrëmje. Gjermania, e cila mban presidencën e G7, po bën thirrje për kujdes.
Ndërkohë Berlini dhe Parisi po u bëjnë thirrje qytetarëve të tyre që të largohen urgjentisht nga Ukraina, ndërsa Lufthansa dhe filiali i saj Swissair njoftojnë pezullimin e lidhjeve ajrore me Kievin duke filluar nga e hëna.
Qytetarëve gjermanë u është kërkuar të largohen urgjentisht nga vendi para se të jetë tepër vonë. Apeli erdhi nga Ministria e Jashtme gjermane, e shqetësuar për evoluimin e situatës me “një konflikt ushtarak” te dera, që mund të shpërthejë në çdo moment dhe që, për rrjedhojë, mund të rrezikojë bashkatdhetarët e tyre. Kërkesa e parë për t’u larguar nga vendi u kishte mbërritur shtetasve gjermanë, me banim në Ukrainë, vetëm 7 ditë më parë, më 12 shkurt.
“Linja ajrore kombëtare gjermane Lufthansa ka pezulluar të gjitha fluturimet për dhe nga Kievi. “Të gjitha fluturimet nga e hëna 21 deri të hënën 28 shkurt, për momentin janë të prekura”, shpjegohet në faqen e internetit të kompanisë.
Menjëherë pas komunikimit gjerman me bashkëqytetarët e saj, edhe Franca u rekomandoi bashkatdhetarëve të largohen nga shteti i Evropës Lindore.
Ministria e Jashtme e Parisit u ka bërë thirrje qytetarëve francezë që të largohen menjëherë nga Ukraina, veçanërisht nga rajonet e Kharkiv, Luhansk dhe Donetsk.
“Qytetarët francezë në rajonet Kharkiv, Luhansk dhe Donetsk… janë të ftuar të largohen nga këto zona pa vonesë. Rekomandohet gjithashtu që të gjithë shtetasit francezë, qëndrimi i të cilëve në Ukrainë nuk ka arsye të vlefshme për t’u larguar nga vendi, “tha në të njëjtën kohë Ministria e Jashtme franceze, e cila gjithashtu u bëri thirrje francezëve që të shtyjnë të gjitha udhëtimet në Ukrainë.
