Banka Botërore në një raport të publikuar sot parashikon që rritja ekonomike për Shqipërinë të jetë 4,4% gjatë këtij viti.
“Banka Botërore parashikon që rritja ekonomike e këtij viti për Shqipërinë të jetë 4,4%, pavarësisht se ekonomia është e lidhur me turizmin që do të vazhdojë të vuajë kufizimet ndërkombëtare të udhëtimeve gjatë 2021”, thuhet në raportin e publikuar sot nga Banka Botërore.
Rritja afatmesme dhe produktiviteti, deklaron BB, duhet të gjallërohen edhe nga përshpejtimi i reformave strukturore në kuadrin e përpjekjeve për anëtarësimin në BE.
“Ekonomitë e Ballkanit Perëndimor u goditën sërish fort nga rigjallërimi i rasteve të COVID-19 në fillim të 2021. Megjithatë, rritja ekonomike për vendet e këtij rajonit, pritet të jetë 4.4% me kusht që të rifitohet besimi i konsumatorëve dhe biznesit dhe pandemia të vendoset nën kontroll”, bëhet e ditur në raport.
Më herët, INSTAT publikoi raportin mbi PBB-në në tremujorin e fundit të vitit 2020. Sipas INSTAT, Produkti i Brendshëm Bruto pësoi një rënie prej 3,31 % gjatë vitit 2020, krahasuar me vitin 2019.
Instituti i Statistikave (INSTAT) tha se sipas një vlerësimi paraprak të PBB-së për vitin 2020, mbështetur në vlerësimet tremujore, pësoi një rënie prej 3,31 % krahasuar me vitin 2019.
Sipas INSTAT, Produkti i Brendshëm Bruto (P.B.B) në tremujorin e katërt të vitit 2020 vlerësohet me rritje prej 2,99 %, kundrejt tremujorit të katërt të vitit 2019.
Statistikat zyrtare të INSTAT për Produktin e Brendshëm Bruto dhe rritjen ekonomike gjatë vitit të shkuar 2020 tregojnë se goditja që ekonomia mori nga pandemia dhe recensioni i shkaktuar ishin në mënyrë domethënëse mjaft më të përmbajtura se sa pritshmëritë dhe shqetësimet fillestare.
Institucionet financiare ndërkombëtare parashikonin një rënie prej rreth 7 % , ndërsa Ministria e Financave dhe Ekonomisë parashikonte rënie prej rreth 4.5%.
