Kalimi i Lionel Messit te Paris Saint-Germaini ishte rrëfimi më i madh i verës së këtij viti. Kjo lëvizje pati ndikim të madh për ekipin francez në çdo aspekt. PSG-ja e siguroi Messin si lojtar të lirë, pasi sulmuesi vendosi të largohej nga Barcelona shkaku i krizës financiare. Ai me skuadrën nga Ligue 1 firmosi kontratë dyvjeçare me mundësinë e vazhdimit edhe për një vit tjetër. Transferimi i Messit te PSG-ja u vlerësua si më i madhi dhe më i rëndësishmi i afatit kalimtar të verës. Mirëpo, çfarë efekti ka pasur fituesi i shtatë “Topave të Artë” në rrjedhën e të ardhurave të PSG-së deri më tani?
Sa fanella të Messit i shiti PSG-ja?
PSG-ja ka shitur pothuajse një milion fanella të printuara me emrin e Messit deri më sot, për edicionin 2021/22, kanë konfirmuar nga klubi francez. Drejtori i klubit, Marc Armstrong, thotë se ardhja e 34-vjeçarit çoi në thyerjen e rekordit të shitjeve të përgjithshme të fanellave për këtë vit dhe beson se numri do të ishte dukshëm më i lartë nëse nuk do të ishin vonesat e prodhimit të shkaktuara nga pandemia COVID-19.
“Messi është një pasuri e madhe. Nga pikëpamja komerciale, ndikimi i tij në klubin tonë është i jashtëzakonshëm”, ka pranuar Armstrong. “Ne besojmë se vitin e kaluar kemi shitur më shumë fanella se çdo klub tjetër dhe ky vit do të jetë edhe më i mirë. Është padyshim shifra më e mirë e fanellave për sa u përket shitjeve me të paktën 30-40 për qind rritje të kërkesës. Kërkesa ka qenë e madhe për fanellën e Messit. Nëse do të mund të prodhonim më shumë, do të shisnim edhe më shumë”.
Sulmuesi argjentinas te skuadra e PSG-së e bart fanellën me numrin 30 dhe jo me numrin dhjetë që e kishte te Barcelona. Aktualisht numrin dhjetë te PSG-ja në fanellë e ka sulmuesi brazilian Neymar.
A ka tërhequr më shumë sponsorë PSG-ja, falë Messit?
Armstrongu gjithashtu zbuloi se ofertat e sponsorizimit filluan ta vërshonin PSG-në sapo u konfirmua largimi i Messit nga Barcelona. Gjigantët francezë lëvizën shpejt për të fituar garën për transferimin e kapitenit të Përfaqësueses së Argjentinës dhe tani po mbledhin shpërblimet, pasi kompanitë e jashtme gjithashtu kërkojnë të përfitojnë nga popullariteti i Messit. Tashmë janë arritur marrëveshje partneriteti me markat e tilla, si “Autohero”, “Crypto.com”, “Smart Good Things” e “Gorillas”, duke i mundësuar PSG-së që të mbledhë miliona të tjerë në të ardhura.
“Ka pasur një ndikim dhe partnerët janë të përkushtuar ndaj çmimit tonë. Më parë kërkesa ishte e mirë, por tani është më e madhe se kurrë”, shtoi Armstrong. “Menjëherë kemi pasur një rritje të ndjeshme të ofertave, edhe para se të nënshkruanim zyrtarisht me Messin. Ne kemi ndier vërtet një ndikim në të gjitha fushat tona të biznesit: nga sponsorizimi e tregtimi, te mikpritja dhe biletat”.
A është shtuar numri i përcjellësve në rrjetet sociale?
Prania në internet e PSG-së është rritur në mënyrë të jashtëzakonshme me Messin në radhët e veta, me 20 milionë përcjellës të fituar në të gjitha platformat e mediave sociale vetëm në javën e parë pas nënshkrimit të argjentinasit. Bëhet e ditur se numri i ndjekësve është rritur me nga një milion për çdo muaj që atëherë, dhe Armstrong thotë se një tjetër rekord i klubit u thye në ditën kur Messi u konfirmua zyrtarisht si lojtar i PSG-së.
“Komuniteti ynë është në nivelin më të lartë të të gjitha kohërave, me 150 milionë fansa të mediave sociale”, tha ai.
Çfarë ka ndodhur me shitjen e biletave?
Messi, i cili ka shënuar gjashtë gola dhe ka bërë pesë asistime në 15 paraqitjet e tij të para me fanellën e PSG-së, ka pasur gjithashtu një efekt pozitiv në shitjet e biletave të klubit. Armstrong pranon se klubi po përpiqet të mbajë kërkesën pasi vazhdon të shesë për çdo ndeshje shumë më përpara biletat, me rritjen e çmimeve tani që është e pashmangshme. Megjithatë, shefi i sponsorizimit të PSG-së ka premtuar se biletat normale do të mbeten të përballueshme për publikun e gjerë, pavarësisht se sa do të rriten nivelet e regjistrimit.
“Ka një kërkesë të madhe që ne, për fat të keq, nuk mund ta përmbushim plotësisht për momentin, kështu që interesi për tregun sekondar po rritet”, tha Armstrong. “Ky është një nga shumë elementët që ne do të shqyrtojmë në strategjinë e çmimeve dhe në të gjitha diskutimet tona. Nuk do të ishte befasuese nëse çmimet rriten. Kjo është një pikë në të cilën ne po punojmë. Në zonat e përgjithshme publike të stadiumit, ne jemi megjithatë të përkushtuar të mbajmë çmimet të përballueshme për t’i lejuar të gjithë tifozët tanë të shijojnë përvojën e Paris Saint-Germainin dhe ta shohin Messin nga afër”.