“Besimtarët tanë shqiptarë që i kemi prezentë këtu janë më shumë besimtarë të fesë sesa anëtarë të institucioneve të tyre, ndjenja dhe vlerat fetare mbizotërojnë mbi përkatësinë dhe mbi anëtarësinë në institucionet e tyre. Dallim midis të qenit besimtar dhe anëtar institucioni ka ndihmuar që shqiptarët besimtar të gjejnë më shumë pika takimi në marrëdhëniet e tyre me besimet dhe fetë e tjera”, deklaroi Kryetari i Kuvendit, Gramoz Ruçi gjatë fjalës së tij në konferencën “Feja si instrument i paqes”, mbajtur në Tiranë.
Ruçi theksoi se, “ndërkohë në sferën tjetër në atë politike kemi një situatë krejt tjetër simpatitë, përkatësitë dhe anëtarësitë në institucionet politike mbizotërojnë mbi ndjenjat, mbi pikëpamjet dhe mbi vlerat demokratike. Ndërsa besimtarët besojnë në Zot dhe në vlera, politikanët besojnë më shumë tek partitë sesa tek vlera e demokracisë dhe sistemit demokratik. Duke konstatuar këtë intolerancë, institucionet fetare shpesh kanë bërë thirrje për tolerancë politike pavarësisht se ne politikanët pak ose shumë pak i kemi dëgjuar ato”.
“Shprehja e njohur “kisha jote është edhe kisha ime” në Shqipëri është plotësuar me mësimet që vijnë nga bashkëjetesa jonë “xhamia jote është dhe e imja”. Shumë rrallë ndodh që të dëgjojmë dy partiakë shqiptarë që të pranojnë se “partia jote është dhe e imja”, tha Ruçi.
Ai shtoi se, “më lejoni të bëj një parantezë, e kam fjalën për qëndrimin e atyre vendeve skeptike të Bashkimit Europian të cilët penguan Këshillin Europian të marrë vendimin për të cilin ne ishim përgatitur sipas rekomandimit të mëparshëm që kishte bërë Komisioni Europian për çeljen e negociatave me Maqedoninë e Veriut dhe Shqipërinë. Uroj që motivet e këtij qëndrimi të jenë realisht dyshimet e tyre, problemet e tyre apo problemet tona për arritjet e reformave integruese në dy vendet tona. Dhe pse nuk jam dakord me ta kam bindjen se vendimi i Këshillit Europian është një vendim i pamerituar dhe nuk i përgjigjet realitetit”.
“Duam apo nuk duam ne këto vende, ky qëndrim i tyre ndaj Ballkanit Perëndimor të cilin ndonjëherë e trajton jo si pjesë po si fqinj të kontinentit tonë ka marrë ose do të marrë në të ardhmen edhe ngjyrime fetare. Përkundër këtij iluzioni, Ballkani Perëndimor edhe pse ka një popullsi të konsiderueshme myslimane është një rajon europian, është pjesë integrale dhe një vlerë e shtuar e qytetërimit perëndimor dhe një kontribues aktiv i paqes, zhvillimit dhe stabilitetit”, përfundoi Ruçi./ATSH/
