Rusia i dhuroi Serbisë tanke T-72MS dhe vetura të blinduara të zbulimit BRDM-2MS me vlerë rreth 75 milionë euro, dorëzimi i të cilave u bë në kazermën e Nishit “Mija Stanimiroviq”.
“Ky është një donacion i Federatës Ruse për ushtrinë e Serbisë në vlerë prej rreth 75 milionë eurosh, e cila përbëhet nga 30 transportues të blinduar BRDM-2MS dhe 30 tanke të modernizuar T-72 MS, bazuar në marrëveshjen e rënë dakord në Sochi nga dy presidentët Vuçiq dhe Putin. Ne jemi shumë mirënjohës për Federatën Ruse, sepse ky është një përforcim i rëndësishëm për ushtrinë e Serbisë”, ka thënë ministri i Mbrojtjes, Nebojsa Stefanoviq, pas dorëzimit.
Ai rikujtoi se pjesa e parë e këtij donacioni, 11 tanke T-72 dhe dhjetë transportues të blinduar, u ekspozuan gjithashtu në Nish në nëntor.
“Sot, kur ato janë kompletuar dhe kur në fakt të dy, batalioni tankist dhe batalioni BRDM-2MS janë plotësuar, ne ekspozojmë këto armë, të cilat do të jenë për forcat e këmbësorisë dhe të cilat do të përmirësojnë ndjeshëm aftësitë tona operacionale”, shtoi ai, njoftoi ministria.
