Rusia të dielën ka regjistruar numrin më të madh të infektuarve me COVID-10 brenda 24 orëve.
Janë regjistruar 10.633 raste të reja, duke sjellë numrin e përgjithshëm në 134.687, ku më tepër se gjysma e rasteve dhe vdekjeve janë në kryeqendër, Moskë, shkruan agjencia Reuters, transmeton KOHA.
Numri i të vdekurve është ngadalësuar në ditët e fundit dhe mbetet dukshëm më i ulët, sesa në shumë shtete tjera që kanë regjistruar numër të madh të infektuarve.
Rusia ka thënë se numri i ulët i të vdekurve është pasi që shpërthimi në Rusi ka ndodhur më vonë se në shumicën e shteteve, duke iu mundësuar autoriteteve të kenë më tepër kohë për t’u përgatitur.
Numri total i të vdekurve në Rusi është rritur në 1280 të dielën, pasi janë raportuar 58 raste tjera me fatalitet në 24 orët e fundit.
Rusia ka qenë në izolim të pjesshëm që nga fundi i marsit, për të parandaluar përhapjen e virusit.
Njerëzit në Moskë mund të dalin nga shtëpitë për të vizituar shitoret ushqimore më të afërta, barnatoret, për të hedhur mbeturinat apo për të shëtitur qenin, por u duhen leje të veçanta për aktivitete të tjera.
Presidenti i Rusisë, Vladimir Putin ka kërkuar që masat kufizuese të mbesin në fuqi deri më 11 maj, kur Rusia përfundon festimin e “Ditës së Punës” dhe “Fitores së Luftës së Dytë Botërore”.
Kryebashkiaku i Moskës, Sergei Sobyanin i ka bërë thirrje banorëve të shtunën të vazhdojnë vetizolimin strikt gjatë këtyre pushimeve të gjata. Sobyanin ka thënë se është bërë përparim për zgjerim të testimit, duke lejuar autoritetet të trajtojnë ata në nevojë më shpejt.
Por, ai ka thënë se numri i personave që janë të sëmurë keq po rritet, mirëpo jo aq shumë sa që ishte parashikuar me skenarin më të keq të mundshëm. Ai thotë se mendon se 2 për qind e Moskës, që ka popullatë prej 12.7 milionë banorë, është infektuar, një shifër dukshëm më e madhe sesa që tregojnë statistikat zyrtare.
“Është e qartë se rreziku po rritet”, ka thënë ai. Ai për stacionin televiziv “Rossiya-1” ka thënë se autoritetet e Moskës mund të reduktojnë numrin e lejeve digjitale të lëshuara për lëvizje përgjatë qytetit, nëse situata përkeqësohet. Kryeministri i Rusisë, Mikhail Mishustin, ka njoftuar presidentin Putin të enjten se ka rezultuar pozitiv me koronavirus dhe se po lëshon përkohësisht postin për t’u rikuperuar. Zëvendës-kryeministri i parë Andrei Belousov, tash po shërben si kryeministër në detyrë. Të premten, një anëtar tjetër i kabinetit rus, Ministri i Ndërtimit, Vladimir Yakushev, ka njoftuar se është diagnostikuar me virus dhe do të trajtohet në spital. Dmitry Volkov, një nga zëvendësit e tij, po ashtu ka testuar pozitiv, ka njoftuar ministria.
