Ministria Ruse e Mbrojtjes tha të Shtunën se ka shmangur një sulm me dronë ukrainas, që synonin gadishullin e Krimesë.
“Mbrëmjen e kaluar, një sulm terrorist me 20 dronë nga regjimit i Kievit kaluan kufirin territorial të gadishullit të Krimesë,” tha Ministria e Mbrojtjes në Telegram.
Katërmbëdhjetë dronët ukrainas u shkatërruan nga sistemet e mbrojtjes ajrore dhe gjashtë të tjerë me mënyra elektronike, shtoi Ministria.
Lajmi erdhi pasi ushtria ruse njoftoi të premten se kishte shkatërruar një tjetër dron ukrainas në perëndim të Moskës.
Ushtria ruse tha se droni kishte për qëllim “një godinë në territorin e Moskës”, pa dhënë detaje për objektivin e mundshëm të mjetit.
Ndërkohë, Bashkimi Evropian mësohet se i ka dorëzuar Ukrainës 223.800 predha artilerie.
Në mars, BE miratoi planin prej 2 miliardë eurosh për t’i dërguar Ukrainës një milion predha të kalibrit 155 mm.
Forcat e Ukrainës janë ankuar për mungesë municioni, ndërsa përpiqen të largojnë trupat e Moskës nga territoret e pushtuara si pjesë e një kundërsulmi të nisur në fillim të qershorit.
Më në veri, presidenti i Bjellorusisë, Aleksander Lukashenko, njoftoi të premten se ai ka urdhëruar qeverinë e tij të rihyjë në kontakt me Poloninë, pasi dy fqinjët kanë tensionuar raportet kufitare midis aleatit të Moskës dhe fqinjit të saj anëtar të NATO-s.
Anëtari i NATO-s, Polonia, ka planifikuar të vendosë rreth 10 mijë ushtarë për të mbrojtur kufirin e saj lindor me Bjellorusinë.
Sipas presidentit Lukashenko, qeveria polake po kërkon “përshkallëzim, përkeqësim të situatës, në mënyrë që të tregojnë se janë armatosur e riarmatosur” në prag të “zgjedhjeve (parlamentare) më 15 tetor ” në Poloni.
Polonia kohët e fundit ka paralajmëruar provokime nga bjellorusët dhe rreziqet e mundshme që paraqit ardhja në Bjellorusi e grupit të mercenarëve rusë, Wagner.
