Rusia ka ndërmarrë një sulm të gjerë me dronë e raketa në Kiev, duke vrarë 4 persona, ndërsa për herë të parë është goditur edhe ndërtesa kryesore qeveritare. Kryeministrja e Ukrainës Yulia Svyrydenco, tha se çatia dhe katet e sipërme të ndërtesës qeveritare janë dëmtuar.
“Armiku terrorizon popullin tonë në të gjithë vendin çdo ditë”, shkruan ajo në mediat sociale.
Forcat ajrore të Ukrainës raportojnë se një numër rekord dronësh dhe raketash u lëshuan nga Rusia, më shumë se 800 në total.
Mes viktimave është edhe një foshnje, teksa sipas kreut të administratës ushtarake të Kievit, Tymur Tkachenko, trupi u nxor nga rrënojat e një ndërtese të shkatërruar. Një tjetër viktimë besohet të jetë një grua e re. Sulmi shkaktoi dëme të mëdha materiale, duke përfshirë shembjen dhe djegien e disa ndërtesave banimi shumëkatëshe.
“Rusët po godasin qëllimisht objektet civile,” deklaroi Tkachenko, duke i bërë thirrje qytetarëve të qëndrojnë në strehimore gjatë alarmit për sulme ajrore.
Ministri i Jashtëm i Ukrainës, Andrii Sybiha, ka bërë thirrje për një përgjigje të fortë nga aleatët e Ukrainës.
“Për herë të parë, më shumë se 800 dronë dhe raketa janë lëshuar gjatë natës. Civilë të vrarë dhe të plagosur, infrastrukturë civile të dëmtuara në Kiev, Odesa, Kremenchuk, Kryvyi Rih, Zaporizhzhia, ndër qytete të tjera. Cinizmi më i madh është se këto sulme brutale vijnë pikërisht kur Presidenti Trump po bën çdo përpjekje për të arritur paqen. Putin, në vend të kësaj, refuzon diplomacinë dhe përshkallëzon terrorin“, tha ai.
Alarmi për sulme ajrore u aktivizua gjatë gjithë natës në të gjitha rajonet e Ukrainës, ndërsa në orët e para të mëngjesit u dëgjuan shpërthime të fuqishme në disa pjesë të Kievit, përfshirë edhe qendrën e qytetit.
Sulmi vjen në një moment tensionesh, pasi presidenti rus Vladimir Putin ka ashpërsuar retorikën e tij kundër Perëndimit dhe ndihmës ushtarake për Ukrainën. Deri tani, ushtria ruse nuk ka dhënë asnjë koment mbi sulmet e fundit të raportuara.
