Rusia ka nisur të ashtuquajturën “kolonë të vdekjes”, siç zbulohet në një seri imazhesh që tregojnë një kolonë që transportonte automjete dhe pajisje ushtarake nga Rusia në vijën e frontit në Ukrainë.
“Është një sinjal për Perëndimin”, tha analisti i mbrojtjes Konrad Muzyka, për gazetën britanike “The Sun”. Konkretisht, në pamjet e publikuara, shihet një tren furnizimi duke lëvizur nëpër një qytet në Rusinë qendrore.
Ajo që po transporton kolona është “një komplet transporti që i përket Drejtorisë kryesore të 12-të të Ministrisë së Mbrojtjes Ruse”, një agjenci që është përgjegjëse për “municionin bërthamor, ruajtjen, mirëmbajtjen dhe transportin”.
Edhe pse për Muzyka imazhet nuk nënkuptojnë se do të nisin “përgatitjet për një lëshim bërthamor”, ai e sheh interesant faktin që Rusia ka autorizuar transportin e pajisjeve ushtarake menjëherë pasi Ukraina siguroi se ekziston një rrezik “shumë i lartë” që Kremlini të përdorë armë nukleare.
Eksperti shpjegoi gjithashtu se Rusia mund të transportojë pajisjet ushtarake në përgatitje për stërvitjet e saj për Forcat Strategjike të Raketave, njësia kryesore e parandalimit bërthamor të vendit.
Në çdo rast, kërcënimi bërthamor është rritur javët e fundit. Që kur Rusia humbi terren në Ukrainën verilindore, ajo ka vendosur të mobilizojë 300 000 rezervistë, me vetë Putinin që paralajmëroi se do të përdorte të gjitha mjetet në dispozicion për t’u mbrojtur.
Kur trupat ruse u larguan nga Lyman pasi u mundën nga ushtria ukrainase, Ramzan Kadyrov, kreu i rajonit çeçen të Rusisë, shkroi një mesazh duke bërë thirrje për “masa më drastike”, si “shpallja e ligjit ushtarak në zonat kufitare dhe përdorimi i armëve nukleare”.
