Presidenti ukrainas, Volodymyr Zelensky, tha se ndërsa ushtria e tij po bën gjithçka që mundet për të larguar forcat ruse nga territori ukrainas, “sot askush nuk mund ta parashikojë se sa do të zgjasë kjo luftë”.
Gjatë fjalimit të përnatshëm të tij, drejtuar ukrainasve, Zelensky tha se përfundimi nuk do të varet vetëm nga populli ukrainas, por nga “partnerët tanë, nga vendet evropiane, nga e gjithë bota e lirë”. Forcat ruse kanë pësuar humbje të mëdha qëkur kanë nisur pushtimin e Ukrainës më 24 shkurt dhe në ofensivën që aktualisht po zhvillojnë në lindje të Ukrainës, kanë bërë pak përparime.
Por, ndërsa forcat ruse dështuan në përpjekjet e tyre që të marrin shpejt kontrollin e gjithë Ukrainës dhe të rrethojnë forcat ukrainase, Kievi tani thotë se lufta po hynë në “fazën e tretë”, në të cilën, forcat ruse do të tentojnë të mbrojnë territorin që e kanë patur nën kontroll. “Kjo tregon se ata planifikojnë që ta bëjë këtë një luftë të gjatë”, tha këshilltari i Ministrisë ukrainase të Mbrojtjes, Viktor Andrusiv.
“Moska duket se po mendon se duke e zvarritur luftën në këtë mënyrë, ajo mund ta detyrojë Perëndimin që të negociojë dhe ta detyrojë Ukrainën që të dorëzohet”, tha zelenski mbrëmjen e të premtes. Ai shtoi se “negociata shumë të vështira me Moskën” po vazhdojnë për përpjekjet për të evakuuar trupat ukrainase nga qyteti-port i Mariupolit, që gjendet në juglindje të Ukrainës.
Mariupoli është shkatërruar nga ushtria ruse, e cila po tenton që të krijojë një korridor tokësor me Gadishullin e Krimesë, të cilin Moska e ka aneksuar më 2014. Dhjetëra ushtarë rusë që janë të plagosur rëndë vazhdojnë të jenë të bllokuar brenda fabrikës së çelikut, Azovstal, në Mariupol. Ushtarët ukrainas në këtë fabrikë janë qëndresa e fundit në Mariupolin e shkatërruar nga forcat ruse.
