Deputeti i Partisë Demokratike, Ervin Salianji ka folur në një prononcim për mediat jashtë dyerve të parlamentit lidhur me mbledhjen e kryesisë së PD-së ku u vendos mbajtja e zgjedhjeve për kryetar në 29 korrik.
I pyetur nga gazetarët mbi situatën në të cilën ndodhet PD, Salianji u shpreh sot se ish-kryetari i PD-së, Lulzim Basha e ka marrë peng këtë forcë politike për interesat e tij private dhe ekonomike.
Përsa i përket situatës së tensionuar që u krijua nga militantët e Lulzim Bashës, Salianji thotë se nëse nuk do të ishte dhuna ndaj gazetarëve, ngjarja do të dukej si një sherr në lagje.
“Interesat private dhe ekonomike të disave te pjesa e vulës ka bërë që te PD të mos ketë më parti. Nëse s’do ishte dhuna ndaj gazetarëve, do ishte si një sherr në lagje. Aty është një njeri i cili e ka marrë peng partinë, ish kryetari nuk u dorëhoq.
U detyrua të largohej, por vazhdon ta marrë zvarrë atë parti. Do të tretet bashkë me partinë dhe bashkë me logon. Nuk kam ndonjë interes përveç interesit që i dhemb çdo demokrati që është sekuestruar vula, sigla, paratë. Aty ka më shumë pretendentë për kryetarë partie, sesa anëtarë partie. Ish kryetarit nuk i interesojnë njerëzit, por i interesojnë paratë se para ka. Është një situatë që çdo demokrat duhet të reagojë me forcë”, tha Salianji.
