Ish-deputeti i Partisë Demokratike, Ervin Salianji ka folur për RTV Ora pak minuta para nisjes së protestës së opozitës së bashkuar.
Salianji nënvizoi pjesëmarrjen masive të qytetarëve, ndërkohë që qartësoi mesazhin e opozitës për krijimin e një qeverie tranzitore dhe largimin e Ramës.
“Ajo që e bashkon protestën e sotme me atë të 16 shkurtit është masiviteti. Por mesa kam parë, në protestën e sotme ka më shumë pjesëmarrje dhe revoltë dhe përpjekje të qytetarëve për të larguar Ramën. Besoj qe do te jetë nje protestë e cila do ta arrijë qëllimin e saj”, tha ai.
Ai po ashtu tha se lënia e mandateve ka krijuar një besim te qytetarët. Qytetarë apo intelektual te cilët e shihnin me skepticizëm kauzën tonë, sot i janë bashkuar opozitës. Në çdo sondazh opozita është mbi 60%, edhe PD nuk do të mundej ta organizonte me strukturat e saj këtë pjesëmarrje masive.
“Ne do të vazhdojmë të kërkojmë zgjidhje politike të krizës në të cilën ndodhet Shqipëria sot. Do vazhdojmë të kërkojmë qeveri tranzitore. Sa më shumë të zgjasë Edi Rama agoninë e vet do të ketë kosto të mëdha personale”, tha ai.
