Ish-zëvendëskryeministri i Italisë, Matteo Salvini ka përshëndetur dërgimin nga ana Shqipërisë të 30 mjekëve dhe infermierëve për t’u ardhur në ndihmë kolegëve të tyre, pas shpërthimit të pandemisë së COVID-19, që ka prekur rëndë pjesën veriore të Gadishullit Apenin.
Salvini, i cili ka qenë edhe ministër i Brendshëm i Italisë i konsideron prekëse fjalët e kryeministrit Rama për këtë ngjarje, që tërhoqi edhe vëmendjen e medias ndërkombëtare, të politikanëve dhe të figurave të tjera të rëndësishme.
”Fjalë prekëse nga kryeministri i Shqipërisë, i cili dërgon 30 mjekë dhe infermierë në Itali: “Vendet e pasura ju kanë kthyer shpinën juve. Ne nuk jemi të pasur, por aq më pak të privuar nga kujtesa. Shqipëria nuk braktis…”, shkruan Matteo Salvini në profilin e tij në Facebook.
