Situata në Veri të Kosovës, duket se është në qendër të shqetësimeve të diplomacisë dhe politikës amerikane. Nisur nga shqetësimi për situatën në Veri të Kosovës, një delegacion i senatorëve amerikanë në Samitin e NATO-s, që po mbahet në Vilnius, Lituani, ka kërkuar një takim me kryeministrin, Edi Rama.
Lajmi bëhet publik nga vetë kreu i qeverisë shqiptare, nëpërmjet një postimi në Facebook.
“Me delegacionin e Senatorëve Amerikanë në Samitin e NATO-s, në një takim të kërkuar prej tyre nisur nga shqetësimi për situatën në Veriun e Kosovës dhe qasjen jokonstruktive të palëve, e cila ka çuar në një përshkallëzim të rrezikshëm që duhet ndalur një orë e më parë, për t’u kthyer në tryezën e Dialogut duke finalizuar Marrëveshjen e Normalizimit”- shkruan Rama.
Zhvillimet në Veri të Kosovës kanë qenë temë edhe gjatë një bashkëbisedimi që Rama pati me Eksperten e Qendrës Evropiane të Këshillit të Atlantikut, Rachel Rizzo.
Lidhur me situatën në Ballkanin Perëndimor, specifikisht në veriun e Kosovës, kreu i qeverisë shqiptare u shpreh se ndjehet më i qetë pas fjalës së presidentit amerikan Biden, sot në këshillin e NATO-s.
Sipas tij, problemet në Ballkanin perëndimor nuk janë në madhësinë e problemeve të Ukrainës, por duhet nënvizuar se ato nuk janë probleme të vogla.
“Është e rrezikshme që Kosova, në veriun e saj, të bëhet një vatër zjarri. Lehtësimi i daialgut duhet medoemos. BE-ja po e lehtëson atë. Por ka probleme me grupet kriminale në veri të Kosovës, të përfshira në trafik droge, armësh etj. Kjo përzierje e mafias me pushtetarët vendorë mund të jetë një situatë shpërthyese. Është koha të kombinojmë dialogun e lehtësuar nga BE-ja, me një qëndrim më të fortë të NATO-s nëpërmjet KFOR-it“- theksoi Rama.
