Ka nisur takimi informal i kryeministrit Rama me krerët e vendeve të Ballkanit Perëndimor. Takimi po zhvillohet në Vilën 30 në kryeqytet dhe mbahet në kuadër të Samitit të Procesit të Berlinit që do të zhvillohet në Shqipëri më 16 tetor.
Sikurse ishte njoftuar, të pranishëm në takim janë komisioneri i BE-së Oliver Varheli, kryeministri i Malit të Zi, Dritan Abazoviç, kryeministri i Maqedonisë se Veriut, Dimitar Kovaçevski, kryeministrja e Serbisë, Ana Brnabiç si dhe kryetarja e Këshillit të Ministrave të Bosnje Hercegovinës, Borjana Kristo.
Në takim mungon kryeministri i Kosovës, Albin Kurti, i cili ndodhet në një aktivitet tjetër në Greqi. Zëdhënësi i Qeverisë së Kosovës, Përparim Kryeziu bëri me dije se Kurti e ka njoftuar Ramën që nuk do të jetë i pranishëm, ndërsa theksoi se kryeministri i Kosovës do të marrë pjesë në Samitin e Procesit të Berlinit.
Çfarë është Procesi i Berlinit
Iniciativa synon rritjen e bashkëpunimit rajonal në Ballkanin Perëndimor. Kjo është një nismë e vitit 2015 për të mbështetur integrimin në Bashkimin Europian të vendeve të Ballkanit Perëndimor: Bosnje Hercegovina, Mali i zi, Kosova, Maqedonia e Veriut, Serbia dhe Shqipëria.
E prezantuar me 28 gusht nga kancelarja Anglea Merkel, Procesi i Berlinit po zhvillohet me mbështetjen e Komisionit Europian, institucioneve financiare ndërkombëtare dhe shteteve anëtare, bazuar në miratimin e akuis komunitar, apo tërësia e të drejtave dhe e detyrimeve të përbashkëta që i bashkon të gjitha shtetet anëtare të Bashkimit Europian.
