I pranishëm në Samitin e OKB-së në Nju Jork, Presidenti i Bajram Begaj, ka zhvilluar një takim me Përfaqësuesin e Lartë dhe njëherazi Zëvendëspresidentin e Komisionit Evropian, Xhosep Borel (Josep Borrell).
Gjatë takimit, Begaj ka falënderuar Borel për mbështetjen dhe vëmendjen e treguar për rajonin e Ballkanit Perëndimor dhe veçanërisht, për hapjen e negociatave me Shqipërinë. Kreu i shteti ka theksuar se një perspektivë e qartë evropiane e rajonit është garanci për sigurinë dhe të ardhmen e tij.
“Presidenti Begaj shprehu vlerësimin për përkushtimin e Përfaqësuesit të Lartë dhe Komisionit, për të mbajtur në fokus integrimin e rajonit, pavarësisht debateve dhe diskutimeve brenda BE-së. Në këtë kontekst ai theksoi se një përspektivë e qartë evropiane e rajonit, është garanci për sigurinë dhe të ardhmen e tij. Presidenti Begaj u shpreh shpresëplotë për pasjen sa më shpejt, të rezultateve të prekshme dhe konkrete në proceset integruese në hapjen e grup-kapitujve themelorë nëpërmjet konferencës së dytë ndërqeveritare dhe siguroi se Shqipëria do të vijojë me vendosmëri procesin e reformave të brendshme”, thuhet në njoftimin e Presidencës mbi takimin.
Po ashtu, Begaj dhe Borel diskutuan edhe në lidhje me situatën në Kosovë, ku kreu i shtetit ka theksuar se dialogu i ndërmjetësuar nga BE dhe mbështetur nga SHBA, është e vetmja rrugë për zbutjen e tensioneve në veri dhe normalizimin e marrëdhënieve me Serbinë
“Në takim, Presidenti i Republikës dhe Përfaqësuesi i Lartë i BE-së diskutuan edhe mbi situatën në Kosovë duke ritheksuar se dialogu i ndërmjetësuar nga BE dhe të mbështetur nga SHBA, është e vetmja rrugë për zbutjen e tensioneve në veri të Kosovës dhe normalizimin e marrëdhënieve midis Kosovës dhe Serbisë. Dialogu është gjithashtu rruga e domosdoshme për integrimin e Kosovës në BE. Bashkëbiseduesit vlerësuan me rëndësi që palët të punojnë së bashku për hapat e tjerë për zbatimin e Marrëveshjes së arritur mes dy vendeve në shkurt dhe mars 2023, si dhe të angazhohen në mënyrë konstruktive në takimet e ardhshme për dialogun”, thuhet në njoftim.
Ndërkohë, Borel ka zhvilluar edhe një darkë joformale me liderët e vendeve të rajonit kanë zhvilluar, ku është diskutuar në lidhje me situatën dhe problematikat me të cilat po përballet Ballkani Perëndimor.
