Në Sarandë u përurua sot Konsullata e Nderit e Republikës Çeke.
Në ceremoninë e organizuara me këtë rast, ishin të pranishëm ambasadori i Republikës Çeke në vendin tonë, Jarosllav Ludva, kryetari i bashkisë së Sarandës, Adrian Gurma si dhe prefekti i qarkut Vlorë, Flamur Mamaj.
Ambasadori i Republikës Çeke, Jarosllav Ludva në fjalën e mbajtur vuri në dukje se fakti që Saranda çdo vit e më tepër po vizitohet nga turistët çekë e bëri të domosdoshme hapjen e konsullatës.
Sipas tij, konsulle nderi është emëruar Loreta Poda Jorkiewits.
“Loreta do të jetë konsulle nderi e Republikës Çeke në Sarandë për të ndihmuar për forcimin e marrëdhënieve dypalëshe jo vetëm në fushën politike por edhe ato tregtare, ekonomike, turistike, njerëzore, etj”, vuri në dukje ambasadori Ludva.
Për kryebashkiakun Gurma hapja e kësaj selie diplomatike është shumë e rëndësishme.
“Saranda është prej vitesh destinacioni më i preferuar për turistët çekë. Ajo ka qenë gjithmonë mikpritëse dhe kështu do të jetë”, tha Gurma.
Ndërsa konsulle e nderit, Loreta Poda Jorkiewits vuri në dukje se zgjerimi i pranisë diplomatike të Republikës Çeke do të ketë ndikim pozitiv në thellimin e marrëdhënieve ekonomike, tregtare, kulturore, turistike, arsimore e njerëzore. Sipas saj, ka ende hapësira të pashfrytëzuara që ofron jugu i Shqipërisë.
Konsullata e Nderit e Republikës Çeke në Sarandë është e para njësi diplomatike e këtij lloji të kësaj Republike në Shqipëri.
Ajo është gjithashtu e para seli konsullore që çelet në Sarandë që pas vitit 1939. Në Sarandë në vitet para Luftës së Dytë Botërore, kanë funksionuar tri konsullata: greke, italiane dhe rumune./ATSH/
