Ish-presidenti i Francës, Nicolas Sarkozy, do të shkojë në burg javën e ardhshme. Ai është dënuar me pesë vjet heqje lirie për përfshirje në një skandal financiar me fondet e fushatës së tij. Hetimet zbuluan se Sarkozy ka marrë para nga regjimi i diktatorit libian Muammar Gaddafi.
Prokurorët e thirrën të hënën dhe i dorëzuan urdhrin për t’u paraqitur në burgun “La Santé” në Paris më 21 tetor.
Sarkozy është 70 vjeç dhe bëhet udhëheqësi i parë francez pas Luftës së Dytë që dënohet me burg. Më herët, ai mbajti një gjurmues elektronik për një dënim tjetër për korrupsion. Edhe pse e ka apeluar vendimin, ai duhet të qëndrojë në burg deri në gjyqin e radhës. Javën e kaluar, ai organizoi një festë lamtumire me rreth 100 të ftuar në Paris.
Sipas gazetës “Le Figaro”, ai u tha miqve se është i pafajshëm dhe nuk do të kërkojë asnjë favor. Në burg, pritet të qëndrojë në një qeli të veçuar, me një orë aktivitet fizik në ditë dhe tri vizita në javë. Ai mund të përfshihet në një njësi të veçantë për të burgosur të ekspozuar, që njihet ndryshe si “njësia VIP”.
Vendimi për apelin pritet brenda disa muajve, por deri atëherë Sarkozy do ta presë pas hekurave. Ky dënim shënon një precedent historik në Francë dhe në Bashkimin Evropian.
Ndërsa shumë shohin këtë si drejtësi që po bëhet, të tjerë vazhdojnë të mbështesin ish-presidentin dhe kërkojnë pafajësinë e tij.
