Ish-mesfushori i Interit dhe Milanit, Clarence Seedorf, shprehu zhgënjimin e tij për mungesën e mundësive stërvitore që i janë ofruar në Serie A.
Holandezi, i cili kaloi 11 vite të kombinuara në gadishullin italian gjatë karrierës së tij si lojtar, së fundmi ishte kryetrajneri i kombëtares së Kamerunit, duke u larguar nga puna në vitin 2019. Para kësaj, ai ka punuar me Deportivo La Coruna, Shenzhen dhe Milan.
Si lojtar, Seedorf ishte një nga mesfushorët më të mirë të gjeneratës së tij, duke fituar dy Scudetto dhe dy tituj të Ligës së Kampionëve me kuqezinjtë.
Duke folur për La Gazzetta dello Sport, Seedorf shprehu haptas zhgënjimin e tij me klubet e Serie A, për mungesën e ofertave.
“Po, prisja një ofertë nga Seria A dhe jam i zhgënjyer që nuk e mora. Unë mbetem i hapur, do të doja të jem sërish trajner, por sigurisht që nuk është problem”, ka thënë Seedorf.
Holandezi kaloi gjashtë muaj me kuqezinjtë në vitin 2014 përpara se të largohej dhe kjo ishte hera e tij e fundit në kampionatin italian.
