Sekretari i Shtetit për Mbrojtjen e Mbretërisë së Bashkuar, Grant Shapps, nëpërmjet një postimi në llogarinë e tij zyrtare në platformën “X”, ka komentuar transferimin e komandës së Batalionit të Parë ë Regjimentit Mbretëror të Princeshës së Uellsit – një forcë rezervë për Forcën e NATO-s në Kosovë (KFOR).
Shapps ka bërë me dije se dërgimi i trupave shtesë në Kosovë, ka ardhur pas një kërkese urgjente nga NATO-ja, derisa ka shprehur bindjen se ky regjiment këmbësorie, përveç garantimit të sigurisë dhe lirinë e lëvizjes për të gjithë qytetarët në Kosovës, do ta bëjë krenare Mbretërinë e Bashkuar.
“Pas një kërkese urgjente nga NATO, kam autorizuar aktivizimin e një batalioni të ushtarëve britanikë për të ruajtur paqen në Kosovë. Në ditët në vijim, qindra burra dhe gra do të vendosen për të garantuar sigurinë dhe lirinë e të gjithëve në Kosovë dhe unë e di se do ta bëjnë krenare Mbretërinë e Bashkuar”.
Rreth 200 ushtarë nga Batalioni i Parë i Regjimentit Mbretëror të Princeshës së Uellsit do t’i bashkohen kontigjentit britanik prej 400 pjesëtarëve në kuadër të misionit paqeruajtës të NATO-s në Kosovë (KFOR), pas sulmit terrorist të 24 shtatorit në Banjskë të Zveçanit dhe rritjes së tensioneve në pjesën veriore të Kosovës të banuar me shumicë serbe.
Këshilli i NATO-s ka autorizuar forca shtesë nga Mbretëria e Bashkuara pas kërkesës së Komandantit Suprem të NATO-s për Evropën (SACEUR), gjeneralit amerikan Chris Cavoli, për të adresuar situatën aktuale, derisa Shefi i Shtabit britanik të Mbrojtjes, admirali Sir Tony Radakin, tha se ky dislokim do t’i japë forcë dhe ekspertizë misionit të NATO-s.
“Vendosja e Batalionit të Parë të Regjimentit Mbretëror të Princeshës së Uellsit demonstron reagimin e Forcave të Armatosura të Mbretërisë së Bashkuar. Ne vazhdojmë të jemi një pjesë themelore e aleancës së NATO-s, duke ndarë ekspertizën dhe forcën tonë ushtarake”, theksoi admirali Radakin, transmeton Ministria e Mbrojtjes.
Nën komandën e NATO-s dhe së bashku me forcat e tjera aleate, siç thuhet në njoftimin e Ministrisë së Mbrojtjes, forcat e Mbretërisë së Bashkuar do të jenë të disponueshme për të kryer operacione në përputhje me mandatin e KFOR-it që buron nga Rezoluta 1244 e Këshillit të Sigurimit për të ruajtur një mjedis të sigurt dhe lirinë e lëvizjes për të gjithë njerëzit në Kosovë.
Angazhimi i Mbretërisë së Bashkuar në kuadër të KFOR-it u zgjat në maj të këtij viti, kur ministri britanik i mbrojtjes, James Heappey, gjatë një vizite në Prishtinë, njoftoi se Mbretëria e Bashkuar do të vazhdojë të kontribuojë në misionin e NATO-s të paktën deri në vitin 2026.
