Sekretari i përgjithshëm i Kombeve të Bashkuara, Antonio Guterres, të enjten e mori dozën e parë të vaksinës kundër koronavirusit.
“Isha me fat dhe mirënjohës që sot mora dozën e parë të vaksinës kundër Covid-19. Ne duhet t’i kthehemi punës për t’u siguruar që vaksina të jetë e qasshme për të gjithë, gjithkund. Me pandeminë, asnjëri nga ne nuk është i sigurt derisa të gjithë të jemi të sigurt”, shkroi ai në rrjetet sociale.
Ai u vaksinua në një shkollë të mesme të Nju Jorkut, ku po vaksinohen edhe moshatarët e tij, shkruan Anadolu.
Ndryshe, që nga dhjetori i vitit 2019, pandemia ka shkaktuar mbi 2.1 milionë vdekje në mbarë botën, duke përfshirë 192 shtete e rajone.
Mbi 101 milionë persona janë infektuar, ndërsa më shumë se 56 milionë tashmë janë shëruar. Shtetet më të prekura janë Shtetet e Bashkuara, India dhe Brazili.
