Ora News, sjell pamje nga selia e PD një ditë pas protestës se thirrur nga ish-Kryeministri Sali Berisha.
Gazetari Everest Dedaj, bën me dije se aktualisht në godinë nuk ndodhet asnjë person, ndërsa në pamje shihet se kati i parë i selisë është i shkatërruar.
Dyer të thyera, xhama në tokë dhe zyra të shkatërruara, është ajo që ka ngelur në selinë blu një ditë pas protestës së 8 janarit.
Ndërkohë gazetari ka bërë me dije se Basha së bashku me një grup deputetësh ka qëndruar në seli deri në orët e para të mëngjesit.
Kati i parë i selisë është i gjithi i hapur pasi është shkatërruar totalisht. Mësohet se edhe në kat të dytë janë thyer xhamat nga protestuesit të cilët e u ngjitën me shkallë.
Protesta e ditës së djeshme që u zhvillua para selisë së PD, u shoqërua me tensione, gjë e cila ka bërë që policia të ndërhyjë. Kjo e fundit ka shpërndarë protestuesit me ujë dhe gaz-lotsjellës, ndërsa ka shoqëruar në komisariat 59 persona mes tyre 8 të mitur.
