Senati amerikan ka ratifikuar pranimin e Suedisë dhe Finlandës në NATO, një votim historik që synon forcimin e bllokut të mbrojtjes mes luftës së Rusisë në Ukrainë.
Ky është zgjerimi më i rëndësishëm i aleancës Atlantike që nga vitet 1990.
Miratimi i Senatit Amerikan u mor si i mirëqenë, pasi republikanët dhe demokratët kishin shprehur mbështetjen e tyre për hyrjen e dy vendeve.
NATO zyrtarizoi ftesën e saj për Suedinë dhe Finlandën për t’u bashkuar me aleancën në fund të qershorit dhe vendimi duhet të shkojë në parlamentet dhe legjislaturat e 30 vendeve anëtare për ratifikim përfundimtar.
Presidenti Joe Biden dërgoi protokollet për ratifikim në Senat në korrik, duke i hapur rrugën votimit, i cili duhej të miratohej nga dy të tretat e Senatit për të pasur sukses. Rezultati përfundimtar i votave të Senatit ishte 95 me 1.
Suedia dhe Finlanda vendosën të aplikojnë për anëtarësim pasi Rusia pushtoi Ukrainën.
