“Nuk është mirë të bullizohet Kosova” – citohet të ketë thënë kryeministri i Kosovës, Albin Kurti në një intervistë për mediumin e njohur amerikan, Bloomberg, derisa po fliste për kritikat dhe presionin e Bashkimit Evropian e Shteteve të Bashkuara të Amerikës.
Kryeministri Kurti ka realizuar një intervistë në telefon, me mediumin amrikan, i cili artikullin e nis me këto fjalë:
“Kryeministri i Kosovës sfidoi thirrjet nga aleatët kryesorë në SHBA dhe Evropë për të hequr dorë nga një konfrontim me Serbinë që ka shkaktuar dhunën më të keqe në një dekadë, duke këmbëngulur që Beogradi të bëjë hapin e parë.”
“Nuk mund të nënshtrohemi”
Shefi i Qeverisë së Kosovës deklaroi se nuk nënshtrohen para kësaj “milicie të dhunshme”.
“Ne nuk mund t’i nënshtrohemi si një republikë demokratike kësaj milicie të dhunshme. Ne duam që gjërat të zgjidhen sa më shpejt të jetë e mundur, por ju e dini se kjo nuk varet vetëm nga ne.” – ka deklaruar ai.
Kritikat e aleatëve, Kurti në këtë intervistë i ka cilësuar si “të padrejta”, e madje, “Bloomberg” shkruan se ai e bëri të qartë që Qeveria nuk tërhiqet pavarësisht presionit në rritje nga ShBA-ja dhe Evropa.
“S’është mirë të bullizohet Kosova”
Kurti është shprehur i hapur për mbajtje të zgjedhjeve të reja në komunat veriore, por, sipas tij vetëm pasi që Serbia të ndërmarrë hapat e parë.
Siç raportohet tutje, liderët evropianë kanë bërë presion ndaj kryeministrit Kurti që ta zbus qasjen e tij, derisa ShBA-ja e ka përjashtuar vendin nga ushtrimet e NATO-s, “Defender 23”.
Këtu, vijon përgjigja e Kurtit:
“S’është mirë që të bullizohet Kosova. Sa herë që ShBA-të kërkojnë diçka prej nesh, ne nuk pyesim pse, por vetëm kur dhe si”.
Ai tutje ka deklaruar se përjashtimi nga ushtrimet “nuk është i drejtë”, deklaratë që e ka bërë edhe më herët.
Raportimin e plotë të “Bloomberg” të titulluar “I hidhur ndaj qortimit të ShBA-së, Lideri i Kosovës sinjalizon qëndrim të rreptë mes përshkallëzimit”, mund ta lexoni KËTU.
Masat e ShBA-së
Nacionale gjatë së shtunës raportoi në lidhje me masat ndëshkuese të ShBA-së, në një tekst të titulluar “Dhjetë ditë nën sanksione: Përjashtimi nga “Defender Europe”, anulim vizitash dhe anulimi i një konference të donatorëve”.
Pra gjatë javës së kaluar, në mes të tensioneve në veri, ShBA-ja konfirmoi se Kosova është përjashtuar nga ushtrimi i NATO-s.
Ndërkohë, ambasadori amerikan, Jeff Hovenier në një bisedë me gazetarë, ku mori pjesë edhe Nacionale, veç se kishte paralajmëruar se nuk do të ketë takime mes zyrtarëve të dyja vendeve.
“Do të çuditesha nëse në këtë situatë, zyrtarët e Kosovës do të kishin ndonjë vizitë bilaterale të nivelit të lartë me ndonjë zyrtarë amerikanë, apo anasjelltas.” – kishte thënë ai.
Dhe kështu ndodhi. Nacionale raportoi para dy ditësh se Ndihmës sekretari në Byronë Ndërkombëtare të Narkotikëve dhe Çështjeve të Zbatimit të Ligjit, Todd Robinson e kishte të planifikuar një vizitë në Kosovë përgjatë këtyre ditëve.
E njëjta është shtyrë pas krizës në veri, na konfirmoi një zëdhënës i Ambasadës Amerikane në Kosovë për Nacionalen.
“Për shkak të krizës aktuale në veri të Kosovë, ndihmës sekretari Robinson ka shtyrë vizitën e tij në Kosovë. Ne i bëjmë thirrje të gjitha palëve që të ndërmarrin hapa të menjëhershëm për deeskalimin e situatës dhe rikthimin në dialogun e ndërmjetësuar nga BE-ja.” – ka thënë ky zëdhënës.
Gjithashtu, gazeta Nacionale nga burimet e veta ka mësuar se dy zyrtarë të lartë të Ministrisë së Drejtësisë e kanë pasur të planifikuar një udhëtim drejt Shteteve të Bashkuara të Amerikës, për të marrë pjesë në një trajnim lidhur me legjislacionin. Megjithatë, pas zhvillimeve të fundit në veri dhe sanksioneve të paralajmëruara, ata nuk do të udhëtojnë drejt Amerikës.
