Në zyrë priti dy zyrtarë të rëndësishëm ndërkombëtarë: përfaqësuesin special të BE-së për Dialogun, Miroslav Lajçak, dhe të dërguarin e posaçëm për Ballkanin Perëndimor të SHBA-ve, Gabriel Escobar.
Presidentja e Kosovës, Vjosa Osmani, gjatë bisedës e konsideroi ndëshkimin e grupeve kriminale dhe individëve që përdorën dhunë ndaj policisë, gazetarëve, pjesëtarëve të KFOR-it, EULEX-it dhe qytetarëve në veri të vendit, si rrugën e vetme për stabilitet.
“Presidentja Osmani ka potencuar se zgjedhjet e reja në komunat në veri të vendit mund të organizohen në përputhje me kornizën aktuale kushtetuese e ligjore dhe në këtë kontekst, ajo shtoi se duhet të sigurohet pjesëmarrje demokratike e qytetarëve që jetojnë në këto katër komuna,” thuhet në njoftimin e Presidencës.
Pas takimit me presidenten Osmani, emisarët ndërkombëtarë bënë bashkë dhe kryetarët e tre partive opozitare kryesore, Memli Krasniqin e PDK-së, Lumir Abdixhikun të LDK-së dhe Ramush Haradinajn e AAK-së.
“Asnjëherë s’kam parë shqetësime të këtij niveli, të kësaj natyre nga ana e partnerëve më të rëndësishëm të Kosovës. Ndjenjë aspak e mirë dhe e lehta që të dëgjosh SHBA-në dhe përfaqësuesin e BE-së duke shprehur zhgënjim kaq të thellë, e cila e ka obligim t’i forcojë raportet tona, jo t’i dëmtojë ato,” deklaroi Krasniqi.
“Po futemi në një situatë bukur shqetësuese për Republikën e Kosovës dhe për më tepër të paqartë. Shqetësuese për shkak të gjendjes së relacioneve që Kosova i ka me aleatët e saj dhe të paqartë për shkak të mungesës së planit dhe gatishmërisë së kryeministrit të Kosovës për dakordim me aleatët tanë,” u shpreh kryetari i LDK-së, Lumir Abdixhiku.
Liderët e opozitës patën kritika ndaj presidentes Osmani dhe i kërkuan që të ishte më e zëshme në këto momente kritike për Kosovës.
Escobar dhe Lajçak janë takuar gjithashtu edhe me drejtuesit e Listës Serbe, me temën kryesore uljen e tensioneve në veri të Kosovës.
Ndërsa mbrëmjen e së hënës në bisedën e zhvilluar me kryeministrin Albin Kurti, rreshtuan këto tri kërkesa: qetësimi situatës në veri të Kosovës, mbajtja e zgjedhjeve të reja dhe kthimi në dialog. Përgjigja e shefit të qeverisë ndaj Lajçakut dhe Escobarit erdhi përmes një njoftimi ku shkruhej se “rruga përpara është ndalimi i menjëhershëm i sulmeve nga ekstremistë të dhunshëm dhe grupe kriminale ndaj organeve të sigurisë vendore dhe ndërkombëtare si dhe gazetarëve”.
Kurti theksoi se vetëm sundimi i ligjit mund t’i hapë rrugë zgjedhjeve të parakohshme, të lira, demokratike e të ndershme.
