Forcat detare të Shteteve të Bashkuara dërguan një luftanije në Ngushticën e Tajvanit për herë të parë që nga ardhja në pushtet e presidentit Joe Biden.
Luftanija “USS John S McCain” e zhvilloi lundrimin në përputhje me ligjin ndërkombëtar, tha Joe Keiley, zëdhënës i Flotës së Shtatë.
“Transiti i anijes nëpër Ngushticën e Tajvanit e shfaq përkushtimin e ShBA-së për një Paqësor të lirë dhe të hapur”, thuhet në deklaratë.
Çështja e Tajvanit, rajon me autonomi, është një ndër sfidat e Bidenit në fushën e politikës së jashtme dhe mund të bëhet pikë përplasjeje mes dy fuqive botërore, Shteteve të Bashkuara dhe Kinës.
Në javën e parë të Bidenit si president, Kina dërgoi dy grupe të aeroplanëve luftarakë afër Tajvanit, duke e nxitur këtë rajon që të marrë masa mbrojtëse, përfshirë dërgimin e një aeroplani luftarak për t’i vëzhguar fluturimet kineze.
Pekini i ka vlerësuar si provokime lundrimet e Ngushticës së Tajvanit dhe ka thënë se ato përbëjnë kërcënim për stabilitetin në rajon, shkruan CTV, transmeton Gazeta Express.
Gjatë vitit 2020, luftanijet amerikane kaluan 13 herë nëpër Ngushticën e Tajvanit, më së shumti që nga viti 2016.
