Shtetet e Bashkuara dëshirojnë që të vendosin një sistem të ri radarësh në Britaninë e Madhe për t’i vëzhguar objektet në largësi më të madhe në hapësirë.
Forca e Hapësirës e Shteteve të Bashkuara është duke zhvilluar një sistem global për identifikimin e caqeve të mundshme që ndodhen deri në 36.000 kilometra larg, në zonat e hapësirës së thellë, ku ndodhen shumë satelitë ushtarakë.
Përpos në Britani të Madhe, ky sistem i radarëve mund të vendoset edhe në Teksas të ShBA-së dhe në Australi, shkruan BBC.
Ministria e Mbrojtjes e Britanisë së Madhe tha se radari i ri ka kapacitet për ta bërë hapësirën më të sigurt.
Shtetet e Bashkuara dhe Britania e Madhe i kanë akuzuar Rusinë dhe Kinën për zhvillimin e armëve që do të mund të përdoreshin për t’i shkatërruar satelitët.
Vetëm vitin e kaluar, mbi 1.000 satelitë të rinj janë lëshuar në hapësirë, përfshirë dhjetë nga ushtria e Shteteve të Bashkuara.
Ndryshe, Shtetet e Bashkuara tashmë kanë në funksion një sistem paralajmërues për hetimin e raketave balistike në hapësirë. Megjithatë, radarët e këtij sistemi mund t’i vërejnë objektet vetëm deri në 20.000 kilometra larg, ndërsa sistemi i ri do ta rriste këtë largësi deri në 36.000 kilometra.
