Shtetet e Bashkuara dhe Britania e Madhe pritet të nënshkruajnë një marrëveshje domethënëse me qëllim të përshpejtimit të zhvillimit të energjisë bërthamore.
Ky plan pritet që të krijojë mijëra vende pune dhe ta forcojë sigurinë energjetike të Mbretërisë së Bashkuar, raporton televizioni BBC.
Pakti pritet të nënshkruhet gjatë vizitës shtetërore të presidentit amerikan, Donald Trump, në Britaninë e Madhe këtë javë. Të dyja palët shpresojnë se marrëveshja do të sjellë miliarda dollarë investime private.
Kryeministri britanik, Keir Starmer, tha se dy vendet “do të ndërtojnë një epokë të artë bërthamore” që do t’i vendosë ato “në krye të inovacionit global”.
Qeveria britanike ka thënë se prodhimi i më shumë energjie bërthamore mund të sjellë zvogëlim të kostos në faturat e amvisërive, të krijojë vende pune, ta forcojë sigurinë energjetike dhe ta luftojë ndryshimin e klimës.
Marrëveshja e re, e njohur si Partneriteti Atlantik për Energji të Avancuar Bërthamore, synon që ta bëjë më të shpejtë procesin e ndërtimit të centraleve të energjisë bërthamore nga kompanitë në të dyja vendet.
Pakti do të sjellë thjeshtim të miratimeve nga rregullatorët, duke e shkurtuar periudhën mesatare të licensimit për projekte bërthamore nga katër në vetëm dy vjet.
Një qëllim tjetër i marrëveshjes janë edhe partneritetet komerciale mes kompanive britanike e amerikane dhe, në këtë drejtim, pritet të njoftohen një numër bashkëpunimesh.
Kyç në mesin e planeve është një propozim i grupit bërthamor amerikan “X-Energy” dhe kompanisë britanike të energjisë, “Centrica”, për të ndërtuar deri në 12 reaktorë bërthamorë të avancuar në Hartlepool, me potencial për të furnizuar me energji 1,5 milion shtëpi dhe për të krijuar deri në 2.500 vende pune./Nacionale
