Administrata e ish-presidentit Donald Trump po shqyrton mundësinë e arritjes së marrëveshjeve me disa shtete për të pranuar migrantët e dëbuar nga ShBA-ja, sipas një raportimi të “Wall Street Journal”.
Ndër vendet me të cilat po zhvillohen bisedime është edhe Kosova, krahas shteteve të tjera në Afrikë, Azi dhe Evropën Lindore, përfshirë Moldavinë.
“Ndër vendet që ShBA-ja ka kërkuar të pranojnë migrantët e dëbuar janë Libia, Ruanda, Benini, Eswatini, Moldavia, Mongolia dhe Kosova”|.
Administrata amerikane shpreson se këto vende do të bien dakord, ndoshta në këmbim të marrëveshjeve financiare ose përfitimeve politike,” shkruan WSJ, duke cituar burime të afërta me këtë proces.
Si model për këtë qasje po përdoret një marrëveshje e arritur me Panamanë në shkurt, sipas së cilës ShBA-ja dërgoi një avion me mbi 100 emigrantë, kryesisht nga Lindja e Mesme, në këtë shtet të Amerikës Qendrore.
Mbetet e paqartë nëse Kosova dhe vendet e tjera të listuara do të pranojnë kushtet e propozuara nga administrata amerikane.
Paraprakisht, Kosova ka arritur marrëveshje me Danimarkën për dhënien me qira të qelive të burgut në Gjilan, për të burgosurit që do të transferohen nga ky shtet.
Ndryshe, më 23 maj 2024, parlamenti i Kosovës ratifikoi një marrëveshje me Danimarkën për dhënien me qira të 300 qelive në burgun e Gjilanit, me qëllim të ekzekutimit të dënimeve daneze. Kjo marrëveshje synon të ndihmojë Danimarkën në zgjidhjen e mbipopullimit të sistemit të saj penal.
Sipas kushteve të marrëveshjes, Danimarka do të paguajë Kosovës rreth 210 milionë euro për një periudhë 10-vjeçare.
Këto fonde do të përdoren për përmirësimin e institucioneve korrektuese të Kosovës dhe për projekte të energjisë së rinovueshme.
Të burgosurit që do të transferohen në Kosovë janë shtetas të huaj të dënuar në Danimarkë, të cilët pritet të dëbohen në vendet e tyre pas përfundimit të dënimit.
Danimarka do të jetë përgjegjëse për rinovimin dhe modernizimin e burgut të Gjilanit për të përmbushur standardet daneze, dhe një drejtor danez do të menaxhojë institucionin me ndihmën e stafit lokal të trajnuar sipas praktikave daneze.
Mirëpo, jo vetëm Danimarka, edhe shteti belg e konsideron Kosovën si opsion potencial për zgjerimin e kapaciteteve të burgjeve jashtë vendit.
Kjo nënkupton marrjen me qira apo ndërtimin e objekteve të burgjeve për të strehuar shtetas të huaj që vuajnë dënimin në Belgjikë.
Ministrja belge e Drejtësisë, Annelies Verlinden, ka konfirmuar se diskutimet janë duke vazhduar dhe se Kosova mund të jetë një nga opsionet, megjithëse po shqyrtohen edhe vende të tjera.
