Një ngjarje e pazakontë ka ndodhur në Houston të Shteteve të Bashkuara të Amerikës, ku një klient ka qëlluar për vdekje një person që po grabiste klientët në një restorant.
Lajmin e kanë bërë të ditur mediat e huaja, sipas të cilave, pas ekzekutimit të grabitësit, klienti u ka kthyer lekët e vjedhura klientëve të tjerë dhe është zhdukur.
Ngjarja ndodhi në një restorant meksikan në Houston dhe dëshmitarët thanë se një burrë me maskë hyri në restorant dhe u drejtoi një armë klientëve, duke kërkuar paratë e tyre.
Teksa rrëmbeu paratë nga tavolina në tavolinë, një nga klientët nxori armën e tij dhe qëlloi disa herë grabitësin, duke e vrarë, sipas pamjeve të sigurisë.
Më pas klienti mori të gjitha paratë që kishte marrë grabitësi dhe ua ktheu klientëve të tjerë përpara se të largohej nga lokali. Kur mbërritën forcat e policisë, ata e gjetën grabitësin të vdekur.
Policia tha se ai ishte një burrë rreth të 20-ave, por identiteti i tij ende nuk është bërë i ditur. Në të njëjtën kohë, ndaj klientit, i cili është në kërkim, nuk është ngritur asnjë akuzë.
