Administrata Biden ka paralajmëruar se pushtimi i Rafahut do të kishte një “efekt jashtëzakonisht të dëmshëm”, pas deklaratës së kryeministrit Netanyahu se, pushtimi do të ndodhë. Një zëdhënës i Departamentit të Shtetit tha se deri tani plani izraelit nuk është kundërshtuar.
Matthew Miller, zëdhënës i Departamentit të Shtetit deklaroi:
“Ne ia kemi bërë të qartët Izraelit se një pushtim tërësor i Rafahut do të kishte një efekt jashtëzakonisht të dëmshëm ndaj civilëve dhe do të cënonte sigurinë e Izraelit. Ndaj kjo nuk është një çështje që ka të bëjë me prezantimin e një plani nga Izraeli. Ne ua kemi bërë të qartë atyre se ka mënyra të tjera për të arritur qëllimin legjitim që është çmontimi dhe mposhtja e batalioneve të Hamasit në Rafah”.
Kryeministri Netanyahu përshkallëzoi zotimin e tij për të pushtuar qytetin jugor të Gazës, duke deklaruar se “ekziston një datë” kur kjo do të bëhet. Ai përsëriti se Izraeli duhet të dërgojë atje trupa në terren.
Këshilli i Sigurimit të OKB-së referoi të hënën aplikimin e Autoritetit Palestinez për t’u bërë anëtar në Komitetin e Pranimit të Anëtarëve të Rinj. Referimi u bë nga ambasadorja e Maltës, që kryeson presidencën e Këshillit.
Ndërkohë, palestinezët u kthyen në qytetin jugor Khan Junis një ditë pasi Izraeli njoftoi se po tërhiqte trupat nga zona. Por shumë prej tyre, kur mbërritën i gjetën shtëpitë e tyre të shkatërruara.
