Departamenti amerikan i Shtetit deklaroi se gazsjellësi “Nord Stream 2”, që do të transportojë gaz natyror nga Rusia në Gjermani përmes detit Balltik, dëmton sigurinë transatlantike.
“Nord Stream 2” dhe linja e dytë e “Turk Stream” janë krijuar për të rritur fuqinë e Rusisë mbi aleatët dhe partnerët tanë dhe ato minojnë sigurinë transatlantike”, deklaroi zëdhënësi i Departamentit të Shtetit, Ned Price.
Price tha se SHBA do të vazhdojë të monitorojë ndërtimin e gazsjellësit, i cili besohet të jetë rreth 90% i kompletuar.
“Ne do të monitorojmë aktivitetin për të përfunduar ose çertifikuar gazsjellësin dhe nëse një aktivitet i tillë zhvillohet ne do të bëjmë një përcaktim mbi zbatueshmërinë e sanksioneve”, theksoi Price.
“Sanksionet do të ishin një nga shumë mjetet në dispozicion të SHBA-së”, shtoi ai.
SHBA argumenton se projekti do të dëmtojë sigurinë energjetike të EUropës duke e bërë Gjermaninë dhe aleatët e tjerë të SHBA-së tepër të varur nga furnizimet me energjinsë ruse.
Gazsjellësi gjithashtu do të anashkalojë Ukrainën, duke privuar fqinjin dhe konkurrencën gjeopolitike të Rusisë nga tarifat e tranzitit që merr për transportimin e gazit rus në pjesën tjetër të Europës.
SHBA ka sanksionuar kompanitë e përfshira në ndërtimin e projektit, por kancelarja gjermane Angela Merkel vazhdon të mbështesë ndërtimin e gazsjellësit.
Përkrahësit e ndërtimit të gazsjellësit gjithashtu kanë akuzuar Uashingtonin se thjesht ishte i interesuar të shesë gazin e tij të lëngshëm natyror në Europë.
Komentet vijnë ndërkohë që janë shtuar thirrjet që Gjermania të braktisë projektin, pas trajtimit të Rusisë ndaj disidentit të burgosur Alexei Navalny dhe mbështetësve të tij.
Ambasadori rus në Berlin, Sergei Nechayev, tha se spekulimet rreth varësisë europiane nga gazi rus janë të pabazuara, në një deklaratë për gazetën “Berliner Zeitung”.
