Qeveria federale e SHBA do të paguajë 1.6 miliardë dollarë (1.3 miliardë pound) për kompaninë Novavax për të prodhuar 100 milion doza për koronavirusin.
Pagesa është më e madhja e bërë deri më tani nga “Operation Warp Speed” i SHBA. – një partneritet midis qeverisë federale dhe sektorit privat për të gjetur një vaksinë për koronavirusin – dhe e katërta e bërë për një prodhues medikamentesh.
Sipas New York Times, Novavax, me qendër në Maryland, nuk ka sjellë kurrë më parë një produkt në treg.
“Shtimi i kandidatit të Novavax në portofolin e larmishëm të vaksinave të Operation Warp Speed rrit shanset që do të kemi një vaksinë të sigurt, efektive, dhe më shpejt – deri në fund të këtij viti,” tha të martën në një deklaratë, Sekretari i Shëndetit dhe Shërbimeve Njerëzore i SHBA, Alex Azar.
Drejtori i Përgjithshëm i Novavax, Stanley Erck i tha të hënën CNN se marrëveshja me qeverinë amerikane “flet për besimin që ata kanë në platformën tonë për të zhvilluar një vaksinë”. Ai shtoi se kompania synon të dërgojë 100 milion doza të vaksinimit deri në shkurt 2021./BBC
