Presidenti francez Emmanuel Macron ka kritikuar vendimin e SHBA-së për të mos dhënë viza për zyrtarët palestinezë përpara takimit të nivelit të lartë të Kombeve të Bashkuara për konfliktin Izrael-Palestinë, duke e quajtur lëvizjen “të papranueshme”.
“Vendimi i SHBA-së për të mos dhënë viza për zyrtarët palestinezë është i papranueshëm. Ne bëjmë thirrje që kjo masë të anulohet dhe të sigurohet përfaqësimi palestinez në përputhje me Marrëveshjen e vendit pritës”, ka shkruar Macron në rrjetin social ‘X’.
Gjithashtu Macron ka bërë të ditur se ka biseduar me Princin Saudit të Kurorës, Mohamed bin Salman, me të cilin do të bashkëkryesojë Konferencën e New Yorkut më 22 shtator për zgjidhjen me dy shtete.
“Objektivi ynë është i qartë: të marrim mbështetje më të gjerë ndërkombëtare për zgjidhjen me dy shtete — mënyrën e vetme për të përmbushur aspiratat legjitime të izraelitëve dhe palestinezëve”, theksoi presidenti francez.
Presidenti francez vuri në dukje se arritja e paqes do të kërkojë një armëpushim të përhershëm, lirimin e të gjithë pengjeve, dërgesat e ndihmës humanitare në shkallë të gjerë në Gazë dhe vendosjen e një misioni stabilizues në enklavë.
Ai nënvizoi më tej nevojën për të siguruar që Hamasi të çarmatoset dhe përjashtohet nga qeverisja në Gazë ndërsa Autoriteti Palestinez reformohet dhe forcohet.
Konferenca, sipas Macronit, synon të shërbejë si një “pikë kthese vendimtare” për paqen dhe sigurinë në rajon.
Javën e kaluar, Uashington vendosi të mos japë viza për zyrtarët e lartë palestinezë, përfshirë Presidentin Mahmoud Abbas, duke i parandaluar ata të udhëtojnë në New York për takimet e Kombeve të Bashkuara në një kohë kur disa vende evropiane po përgatiten të njohin shtetin e Palestinës.
