Sekretari amerikan i Shëndetësisë, Alex Azar ka paralajmëruar se SHBA-së “po i mbyllet mundësia” për të ndërmarrë veprime për frenimin efektiv të koronavirusit, teksa numri i rasteve të konfirmuara në këtë shtet e ka kaluar 2.5-milionëshin.
Azar i është referuar rritjes së shpejt të numrit të të infektuarve. Shumë shtete në jug dhe perëndim të SHBA-së kanë regjistruar rritje të numrit të të infektuarve, pas lirimit të masave.
Numri i të infektuarve në SHBA e ka kaluar 2.5-milionëshin, ndërsa 125.000 veta kanë vdekur.
Rritja e numrit të të infektuarve me koronavius, sidomos në shtetin e Texasit dhe Floridës, ka bërë që disa kufizime të kthehen sërish, me paralajmërimet që spitalet së shpejti do të jenë të stërmbushura, raporton BBC.
Në kryeqytetin e Texasit, Austin, shumë njerëz kanë dalur në demonstrata, për ta kundërshtuar rregullin e mbajtjes së maskave në raste të caktuara, për të zvogëluar përhapjen e virusit.
Zyrtarët shëndetësorë ndërkohë kanë thënë se shifra reale e të infektuarve mund të jetë dhjetëfishi i totalit të regjistruar. Sipas Qendrës amerikane për Kontroll të Sëmundjeve, deri në 20 milionë amerikanë mund të jenë të infektuar.
