Forcat amerikane kanë sekuestruar një cisternë të madhe nafte pranë brigjeve të Venezuelës, ka bërë të ditur Presidenti Donald Trump, në një lëvizje që përbën përshkallëzimin më të fortë të presionit ndaj regjimit të Nicolás Maduro-s.
“Ne sapo kemi sekuestruar një cisternë në bregun e Venezuelës – një shumë të madhe, ndoshta më të madhen që është kapur ndonjëherë”, deklaroi Trump në Shtëpinë e Bardhë. Pamjet e publikuara nga Prokurorja e Përgjithshme Pam Bondi treguan çastin kur një helikopter ushtarak zbret trupa të armatosura me litarë mbi anije.
Bondi e përshkroi mjetin detar si “tanker të naftës bruto të përdorur për transportimin e naftës së sanksionuar nga Venezuela dhe Irani”, duke shtuar se operacioni u koordinua nga FBI, Departamenti i Mbrojtjes, Departamenti i Sigurisë Kombëtare dhe Roja Bregdetare e SHBA-ve.
Caracasi reagon: “Pirateri ndërkombëtare”
Qeveria e Maduro-s reagoi ashpër, duke e cilësuar sekuestrimin si një akt “piraterie ndërkombëtare”. Më herët gjatë ditës, vetë Maduro kishte deklaruar se Venezuela “nuk do të bëhet kurrë koloni nafte”.
SHBA e akuzon prej kohësh Karakas-in për kontrabandë droge drejt territorit amerikan dhe për përdorimin e rrjeteve të paligjshme të tregtisë së naftës për të financuar grupe të huaja të shpallura terroriste.
Venezuela, e cila ka disa nga rezervat më të mëdha të naftës në botë, akuzon Washingtonin se kërkon “të vjedhë burimet e vendit”.
Analistët paralajmërojnë se sekuestrimi mund të rrisë rreziqet për transportuesit e naftës dhe të trazojë më tej eksportet venezuelase. Çmimi i Brent u rrit lehtë të mërkurën pas publikimit të lajmit, për shkak të shqetësimeve për furnizimet afatshkurtra.
Cisterna “Skipper”: një anije e sanksionuar prej vitesh
Kompania e vlerësimit të rrezikut detar Vanguard Tech e identifikoi mjetin si Skipper, i cili sipas të dhënave ka “manipuluar vendndodhjen” për një kohë të gjatë duke transmetuar koordinata të rreme.
SHBA-të e kishin sanksionuar këtë anije në vitin 2022 për përfshirje në skema kontrabande nafte që gjeneronin të ardhura për Hezbollah-in dhe Korpusin e Gardës Revolucionare Islamike – Forcat Quds.
BBC Verify gjeti se sipas MarineTraffic, Skipper lundronte nën flamurin e Guajanës në përditësimin e tij të fundit dy ditë më parë. Por autoritetet detare të Guajanës njoftuan mbrëmjen e së mërkurës se anija po “përdorte në mënyrë të rreme flamurin e Guajanës” dhe nuk është e regjistruar atje.
Operacioni: helikopterë, marinsa dhe forca speciale
Sipas CBS, helikopterët e përdorur në operacion u ngritën nga aeroplanmbajtësja USS Gerald Ford, më e madhja në botë, e vendosur muajin e kaluar në Karaibe. Operacioni përfshiu dy helikopterë, 10 pjesëtarë të Rojës Bregdetare, 10 marinsa dhe elementë të forcave speciale.
Burime të administratës thanë për CBS se Sekretari i Mbrojtjes Pete Hegseth ishte i informuar për operacionin dhe se mund të ndërmerren veprime të tjera të ngjashme.
Kur u pyet nga gazetarët se çfarë do të ndodhë me naftën në bord, Trump tha: “E mbajmë ne, besoj… supozoj se do ta mbajmë naftën”.
