Britania po përballet me kërcënim të përshkallëzuar nga shtetet armiqësore, si Rusia, Irani dhe Kina, derisa rreziku nga terrorizmi është “i lartë” me “Al-Aqedan” dhe “Shtetin Islamik” që po mundohen ta nisin sulmues të mundshëm, ka paralajmëruar të enjten (16.10.2025) shefi i agjencisë së brendshme të inteligjencës së Mbretërisë së Bashkuar, raporton Reuters.
Drejtori i përgjithshëm i MI5, Ken McCallum, ka thënë se ka rritje prej 35 % të numrit të personave që po hetohen lidhur me shkallën e aktivitetit kërcënues, duke theksuar se shtete armiqësore po lëshohen përherë e më shumë në metoda “të shëmtuara”, të përdorura zakonisht prej terroristëve.
McCallum ka thënë se agjencia e tij ka shpartalluar “një mori komplotesh të përgjimit me qëllim armiqësor” nga Rusia dhe se u ka rënë në gjurmë më shumë se 20 komploteve potencialisht vdekjeprurëse të mbështetura nga Irani.
“Më 2025, MI5 po merret me vëllim më të madh dhe me gamë më të të gjerë të kërcënimit nga terroristët dhe aktorët shtetërorë, sesa kemi parë ndonjëherë tjetër”, ka thënë ai në fjalimin e përvitshëm në selinë e MI5 në Londër.
Britania vazhdimisht ka folur për veprimet armiqësore të cilat po i ndërmerr Rusia, Irani dhe Kina.
Më herët gjatë këtij viti, gjashtë shtetas bullgarë u burgosën për spiunim për Rusinë, duke kryer përgjime në emër të saj, derisa pesë burra u dënuan gjithashtu për kryerje të zjarrvënieve të qëllimshme ndaj bizneseve të lidhura me Ukrainën në Londër, për të cilat zyrtarët britanikë kanë thënë se ishin urdhëruar prej grupit mercenar rus, “Wagner”.
“Me partnerët tanë tanë në mbarë Europën, MI5 do të vazhdojë të detektojë ata që marrin urdhra nga banditët rusë”, ka thënë McCallum.
“Dhe ne do të vazhdojmë të ndjekim gjurmët deri te ata që japin urdhra, të cilët imagjinojnë se janë anonimë dhe të pakapshëm pas ekraneve të tyre. Ata nuk janë”.
Ai ka deklaruar se Kina është fajtore për spiunazh kibernetik, joshjen e ekspertëve në Kinë, ndërhyrjen e fshehtë në jetën publike të Mbretërisë së Bashkuar dhe ngacmimin e disidentëve pro-demokracisë në Britani.
Sa i përket Iranit, ka thënë se Teherani po përpiqet “tërbueshëm” të heshtë kritikët në mbarë botën dhe ka spikatur se si Australia kishte zbuluar përfshirjen iraniane në komplote antisemite dhe se autoritetet holandeze kishin zbuluar një përpjekje të dështuar për vrasje.
McCallum ka thënë gjithashtu se kërcënimi terrorist për Britaninë mbetet “i madh” me MI5 dhe policinë që kanë penguar 19 komplote sulmi në fazën e vonë që nga fillimi i vitit 2020.
“’Al-Qaeda’ dhe ‘Shteti Islamik’ po bëhen përsëri më ambiciozë, duke përfituar nga paqëndrueshmëria jashtë vendit për të fituar terren më të fortë”, ka thënë ai.
