Forcat e Armatosura shembën sot në mënyrë të kontrolluar objektin 4-katësh në Shkozet, i dëmtuar rëndë nga tërmeti i 26 nëntorit. Ky është objekti i dytë që shembet në këtë zonë.
Forcat e Armatosura vijojnë angazhimin për përballimin e pasojave të shkaktuara nga tërmeti i javës së shkuar.
Xhenierët e Komandës Mbështetëse në bashkëpunim me IKMT, vijojnë punën për shembjen e kontrolluar të objekteve të dëmtuara nga tërmeti, të cilat janë klasifikuara si të pabanueshme.
Aktualisht, xhenierët e FA punuan për shembjen e kontrolluar të një objekti 4-katësh në Shkozet.
Puna në terren po koordinohet edhe me Prokurorinë, e cila në kuadër të hetimeve të nisura, po mbledh prova materiale përpara shembjes së objekteve./ATSH/
