Kreu i PD, Sali Berisha, ka reaguar në një deklaratë për mediat për shkarkimin e zëvendëskryeministrit Arben Ahmetaj.
Berisha u shpreh se me këtë lëvizje Rama po tenton të mbulojë kontratat mafioze. Për Berishën, Rama është përgjegjësi kryesor për aferën e inceneratorëve.
“Sot njoftohet se Edi Rama, për të larë duart me krimin e tij të shëmtuar, aferën ndër më të mëdhatë e historisë së vendit, aferën e djegësave, ka shkarkuar nga detyra Arben Ahmetajn. Me këtë rast, unë duke e konsideruar Ahmetajn, një nga eksponentët kryesorë të mafies së djegësve, shtoi se kreu i kësaj afere është një dhe vetëm një, Edi Rama.
Ai ka firmosur në kundërshtim me ligjin. Rama ka firmosur në mënyrën më të paligjshme kontratën bazuar në procedurën antiligjore të negociatave të mbyllura. Rama, në shkelje flagrante të ligjit dhe barazisë në tendera, ka firmosur kontratën e një kompanie, e cila kishte zero eksperiencë në fushën e plehrave”, tha Berisha.
Berisha: Paratë për djegësat dolën nga fondi i emergjencave nga Këshilli i Ministrave
“Edi Rama është përgjegjësi numër 1 i vjedhjes monstruoze me aferën e djegësave.
Për djegësin e Elbasanit dhe Fierit, ministria e Mjedisit që u përdor për këtë vjedhje, kishte zero lekë në buxhetin e saj.
Paratë e djegësave u morën nga fondi i emergjencave të Këshillit të Ministrave.
Ky fond përdoret vetëm në rastin e katastrofave natyrale dhe fatkeqësive të mëdha natyrore.
Edi Rama, këtë fond, e përdori për të përvetësuar, bashkë me zyrtarët e tij, dhjetëra e dhjetëra milionë euro.
Me urdhër të tij, ai kaloi nga fondi i emergjencës dhjetëra e dhjetëra miliona euro, në buxhetin e Ministrisë së Mjedisit për vjedhjet me inceneratorët.
Edi Rama është përgjegjës sepse firmosi kontratën me procedurë të mbyllur, në një kohë kur enti zyrtar, Agjencia e Prokurimeve Publike, kishte denoncuar më përpara, si të paligjshme për prokurim procedurën me negociata të mbyllura”, tha Berisha.
