Ilir Demalia në një lidhje të drejtpërdrejtë për Ora News, u shpreh se shkarkimi i Presidentit Ilir Meta nga Kuvendi është një situatë qesharake, ashtu siç është i gjithë shteti shqiptar sot me të gjitha institucionet.
“Mua më duket krejt qesharake. E gjithë kjo është qesharake për vetë faktin se kemi një parlament ilegjitim, de facto, zhvillohet në një kohë që është një çështje kaq serioze shkarkimi i Presidentit. E gjithë skena është tepër qesharake ashtu siç është qesharak vetë shteti shqiptar sot dhe të gjitha institucionet, nuk kanë pikë serioziteti. Nëse Gjykata Kushtetuese do ta kalojë atëherë kjo do të tregojë dhe një herë gjendjen e rëndë të shtetit. Edhe mbrojtja që po mundohet t’i bëhet sot njerëzve që po dalin në funksion nga Departamenti i Shtetit , ku do dalin dhe të tjerë, madje nga informacionet e fundit ka dhe gazetarë që nuk do të hyjnë dot më në Amerikë. Ka dhe gazetarë që janë të lidhur me këto banda politike”, tha Demalia.
Demalia u shpreh se kjo situatë ka krijuar një rreth vicioz ku ët gjithë mendojnë se çfarë do të ndodhë me Metën dhe askush nuk mendon se ku po shkon shoqëria shqiptare.
“E gjithë situata ka rënë në një rreth vicioz. Edhe media, edhe politika edhe shoqëria sillen në një rreth vicioz, çfarë do ndodhë me Metën, a do e fusin në burg Metën dhe askush nuk mendon se ku po shkon shoqëria shqiptare. Sot janë në një gjendje të rëndë. Amerika dhe Evropa e kanë marrë seriozisht korrupsionin në Ballkan dhe më gjerë sepse gjithë kjo para ilegale nuk dihet ku kanalizohet“, tha Demalia.
Kuvendi votoi ditën e djeshme, 9 qershor me 104 vota pro shkarkimit të Presidentit Meta. Nga dita e votimit, Kuvendi ka 5 ditë kohë për ët çuar çështjen në Gjykatën Kushtetuese. Gjykata më pas duhet të marrë një vendim brenda 3 muajsh. Duhen të paktën 5 vota nga anëtarët e Gjykatës për shkarkimin e zotit Meta.
