Këshilli Prokurorial i Kosovës ka marrë sot vendimin për shkarkimin e ushtruesit të detyrës së kryeprokurorit të Shtetit, Besim Kelmendi.
Me pesë vota pro Kelmendi u shkarkua nga detyra, ndërkohë vendin e tij do të zërë nga dita e nesërme prokurori Agron Qalaj.
Kryesuesi i Këshillit Prokurorial të Kosovës, Ardian Hajdari ka propozuar për Ushtrues Detyre Kryeprokuror Agron Qalajn.
Shkarkimi i Besim Kelmendit vjen një ditë pasi ai mbajti një konferencë të jashtëzakonshme për media, në të cilën ka mohuar raportimet se ka bashkëpunuar me gjyqtaren serbe, Danica Marinkoviq, më 1999, e cila kishte në ngarkim rastin e masakrës së Reçakut. Marinkoviq punonte si gjyqtare në Gjykatën e Qarkut në Prishtinë, dhe e kishte cilësuar masakrën si “ngjarje të trilluar”.
Në atë masakër u vranë 45 civilë shqiptarë. Kelmendi e ka konfirmuar se gjatë ditës së mërkurë është paraqitur si dëshmitar në Prokurorinë Speciale të Kosovës lidhur me punën e tij në gjykatë në kohën kur ka ndodhur masakra. Sipas tij, në atë periudhë ishte i punësuar në Gjykatën e Qarkut në Prishtinë si bashkëpunëtor profesional, duke theksuar se kryente punën e procesmbajtësit, ndaj i mohoi akuzat se ishte asistent i Marinkoviqit. Sipas tij, Marinkoviq ishte gjyqtarja që “zhduku provat për masakrën e Reçakut”.
