Posa të ndalojë era, rikthehen shtëllungat e tymit mbi gjithë kryeqytetin. Madje sot, Shkupi është radhitur i pesti në botë ndër qytetet me ajrin më të ndotur. Stacionet matëse tregojnë ndotjen më të lartë në Komunën e Qendrës me një matje prej 203 mg/m3 të grimcave PM10 në ajër.
Ekologjistët gishtin e drejtojnë nga industria e rëndë, si ndotësit më të mëdhenj. Partia e gjelbër “DOM” propozon që me ligj të ndalohet importimi i mbeturinave për djegie nga gjigandët industrial, përcjell Gazeta Express nga Alsat-M.
“Me vite të tëra u themi institucioneve se industria ndot shumë më tepër se sa tregohet nga Inspektorati shtetëror i ambientit jetësor. Rezultatet nga të gjitha kontrollet e objekteve industriale se janë në rregull, kurse ne qytetarët shohim tym dhe durojmë ndotjen. Kjo nuk është në rregull. Nuk mund të lejojmë që ata për hesape të veta, të ndotin ajrin dhe rrezikojnë shëndetin” tha Liljana Popovska, Partia “DOM”.
Ministri i Ambientit Jetësor Naser Nuredini tha se nuk është në dijeni sa ton mbeturina në vit hyjnë në shtet për tu përdorur si lëndë djegëse nga fabrikat. Tha se Inspektorati shtetëror i mjedisit nuk pushon, por kërkoi edhe ndihmën e mediave që të detektohen ndotësit më të mëdhenj të ajrit.
Përveç industrisë së rëndë, ambientalistët si ndotës të ajrit e shohin edhe deponinë “Drislla”. Prokuroria Themelore e Shkupit, sot kumtoi se nuk ka gjetur asnjë provë që është kryer vepër penale nga “Drisla” e cila sipas denoncimeve se ka djegur mbeturina mjekësore në mënyrë të paligjshme. Një vit më parë, Ministria Ekologjisë dhe Inspektorati Mjedisit u njoftuan se furra që digjte mbeturina mjekësore dhe materieve tjera të rrezikshme është lënë jashtë funksionit për shkak të dëmtimeve të filtrit. Pas një muaji u aktivizua, siç u tha, duke respektuar standardet ekologjike.
