Policia e Shtetit në Shqipëri ka bërë të ditur se e kanë proceduar penalisht një 38-vjeçar nga Gjakova, i cili kishte tentuar t’i korruptonte policët pasi që ishte ndaluar duke vozitur duke përdorur telefonin.
Kjo u bë e ditur përmes një postimi në rrjetin social në Facebook në faqen e Policisë së Shtetit.
“Shërbimet e Policisë rrugore të Durrësit kanë ndaluar në rrugën ‘Pavarësia’, drejtuesin e një autobusi që po përdorte celularin ndërkohë që ishte në lëvizje. Në momentin e ndalimit, ai i ka ofruar para, punonjësve të Policisë, për të shmangur ndëshkimin me masë administrative për shkeljen e kryer”, thuhet në njoftim.
Sipas njoftimit ai është liruar në procedurë të rregullt.
“Në vijim të veprimeve, u referuan materialet në Prokurori ku nisi procedimi në gjendje të lirë për shtetasin A. A., 38 vjeç, banues në Gjakovë, për veprën penale ‘Korrupsioni aktiv i personave që ushtrojnë funksione publike’”, thuhet ndër të tjera në njoftim.
